Bettysbaai verjaardagnaweek loop erg skeef
2010-09-09 11:03
- Artikelopsies
- Deel
- Kry Die Burger op
'n Verjaardagnaweek het in ’n geveg ontaard toe ’n jong man en sy vriende na bewering in ’n vakansiehuis in Bettysbaai aangeval is, glo nadat hul aanvallers se bande gesny is.
Drie verdagtes van Kleinmond, almal 18 jaar en ouer, verskyn Vrydag in die Caledon-landdroshof in verband met die aanval die naweek in die vakansiedorp.
Hulle word deur aanklagte van aanranding met die opset om ernstig te beseer en opsetlike saakbeskadiging in die gesig gestaar.
Mnr. Krish Naidoo van Avondale, Parow, het die afgelope naweek ’n huis in Bettysbaai gehuur sodat sy seun, Praveen, vir sy 23ste verjaardag ’n groep van 11 vriende tussen die ouderdomme van 16 en 25 jaar oud daar kon onthaal.
Een van die vriende, mnr. Eugene Rall (25), het aan Die Burger gesê hulle het plaaslike skoolseuns by ’n kuierplek, waar hulle potspel gespeel het, ontmoet. Dié seuns is saamgenooi na die vakansiehuis, maar is toe gevra om te gaan nadat hulle na bewering “roekeloos” bestuur het.
Die seuns is toe vort, maar het later teruggekeer met wat Rall as “versterkings” beskryf het.
“Die hel was behoorlik los, want skielik daar was nóg twee seuns, twee volwassenes en drie meisies. Die mans was gewapen met ’n byl, bottels, skroewedraaiers en dik stokke,” het Rall gesê.
Rall is na bewering so bygedam dat hy ligte harsingskudding opgedoen het en sy lyf is ook glo vol kneusplekke. Die ander partytjiegangers moes glo traumaberading ontvang.
Die huis is na bewering erg beskadig. Volgens die eienaar – wat nie sy naam wil noem nie – beloop die skade etlike duisende rande.
Kapt. Jakobus Marthinus, stasiebevelvoerder van Kleinmond-polisie, het die voorval bevestig.
Hy het gesê die plaaslike seuns se motorbande is glo stukkend gesteek. Hulle het hul ouers gaan haal en teruggekeer.
Marthinus het gesê net die drie verdagtes is tot dusver in hegtenis geneem, maar die ondersoek duur voort.