Beleggers kry dalk hul geld ná lang stryd
2011-11-17 00:00
- Artikelopsies
- Deel
- Kry Die Burger op
Kaapstad
Duisende mense wat saam sowat R4,5miljard in die nasionale eiendomsindikasie PICvest belê het en wag op laat rente-uitbetalings, kan moontlik binne dae betaal word.
Dit kan gebeur indien ’n lening van R21miljoen finaal deur RMB (RandMerchantBank) goedgekeur en uitbetaal word aan die nuut aangestelde besigheidsredding-praktisyn, mnr. Hans Klopper van Independent Trustees.
Landwyd kou tussen 18000 en 19000 beleggers al maande lank klippe nadat rente-uitbetalings van verskillende PICvest-maatskappye van ’n beloofde 12% tot 6,5% verminder is.
Hoewel die totale belegging in die sindikasie tot R4,6miljard kan wees, is die huidige markwaarde van die eiendom slegs R2,6miljard, het Klopper gesê.
Die verskil tussen wat belê is en wat die eiendom nou uiteindelik werd is, word opgemaak deur ’n kombinasie van faktore soos die eiendomsmark wat geval en tussengangers wat waarskynlik van die geld gekry het, asook bestuurspraktyke.
“Ek is baie bekommerd. Ek het R200000 belê. My vriend het amper R1miljoen belê,” het ’n inwoner van Worcester gister gesê.
Hy het vroeër vanjaar nog 12% rente gekry, maar dit is na 5% verminder en nou sukkel hy om enige geld te sien.
Agt sindikasie-maatskappye van PICvest – Highveld Syndication 15 tot 22 – is begin September onder besigheidsredding geplaas.
Klopper het gister bevestig dat hy aangestel is as die besigheidsredding-praktisyn en dat hy besig is om ’n lening vir R21miljoen by RandMerchantBank te finaliseer. Hy hoop om vandag, of op die laaste môre, die geld te kry sodat beleggers se rente uitbetaal kan word.
Klopper het gesê hy het tot 30 November uitstel gekry om ’n reddingsplan op te stel.
Die Georgiou-eiendomsgroep, met die eiendomsontwikkelaar mnr. Nic Georgiou aan die stuur van sake, en die PICvest-sindikasies word in samewerking bedryf.
Die sindikasies se eiendomme is almal van Georgiou gekoop.
Sake24 het voorheen berig dat Georgiou-beleggers nie net ’n gewaarborgde opbrengs (gewoonlik 10% tot 12%) beloof het nie, maar ook dat hy die eiendom ná vyf jaar teen ’n gewaarborgde prys sal terugkoop.
Hy het beleggers egter vroeër vanjaar ingelig dat hy die ooreenkomste nietig gaan verklaar en dat hulle ’n opbrengs van net 6,5% gaan ontvang.
Klopper is in dié stadium verseker dat die roete van besigheidsredding baie positiewer as ’n likwidasieproses is. “Daar is ruimte in die regstelsel vir besigheidsredding waar daar nog hoop is,” het hy gesê.
- Die Burger