Behandelingsyfers vir vigs onbekend
2010-03-17 23:50
- Artikelopsies
- Deel
- Kry Die Burger op
Kaapstad
Die provinsiale departement van gesondheid weet nie hoeveel gevalle van MIV-positiewe mense wie se CD4-telling getoets word opgevolg word met vigsbehandeling nie, “maar sal dit ondersoek”.
Mnr. Theuns Botha, provinsiale minister van gesondheid, het vandeesweek op die provinsiale parlementsitting gesê sy departement beskik nie oor die administratiewe en mensekapitaal om elke CD4-telling-toets op te volg nie.
Volgens me. Joselene Witbooi, ANC-LPP, keer byna die helfte van pasiënte wie se CD4-telling getoets word nie terug vir die uitslae nie en word talle dus nie deel van ’n behandelingprogram nie.
Dié toets is belangrik om vas te stel wanneer die pasiënt met vigsbehandeling moet begin. Die departement van gesondheid het met R38,3 miljard oor die volgende drie jaar die grootste hap uit die provinsiale begroting ontvang.
Die departement het ’n mikpunt gestel om die aantal mense wat vigsbehandeling ontvang van 68 000 tot meer as 90 000 in die huidige boekjaar op te stoot.
Die departement begin volgende maand met die implementering van sy nuwe beleid om behandeling te bied aan mense met ’n CD4-telling van 350 of minder.
Me. Helen Zille, die premier, het vroeër in haar openingsrede gesê die provinsie wil ook die vigsvoorkomssyfer in die provinsie van 16% tot 8% verlaag.
Maar vir eers weet die departement nie hoeveel pasiënte wat getoets word keer terug vir die toetsuitslae nie.
Botha het gesê tussen 6 000 en 7 000 uit elke 100 000 mense wat hier vir MIV/vigs getoets word, sal waarskynlik volgens huidige riglyne vir vigsbehandeling kwalifiseer. Volgens hom is 385 389 mense die afgelope nege maande in die provinsie vir MIV/vigs getoets.
“Dit is provinsiale beleid om aan te bied om ’n CD4-toets te doen sou die pasiënt positief vir MIV/vigs toets. Die MIV/vigstoets kan onmiddellik met ’n vingerprik gedoen word, maar met die CD4-toets word bloed getrek en na ’n laboratorium gestuur. Uitslae is gewoonlik eers binne vier tot tien dae bekend.”
Hy het gesê een van die groot probleme is dat mense nie die omvang van die siekte verstaan nie.
- Die Burger