Baasspeurder soek nou Anika se moordenaar
2010-05-21 00:19
- Artikelopsies
- Deel
- Kry Die Burger op
PRETORIA. – Brig. Piet Byleveld, internasionaal erkende baasspeurder, is gister opdrag gegee om die ondersoek na die tergende raaisel rondom die Anika Smit-moordsaak oor te neem.
Byleveld, wat einde Junie die tuig as die land se topspeurder neerlê, het gister by die Internasionale Polisie-assosiasie (IPA) in Pretoria gesê Gauteng se speurhoof het hom gisteroggend opdrag gegee om die ondersoek oor te neem.
“Ek weet nie of daar ’n probleem is met die ondersoek nie, maar ek gaan eers môre (vandag) die dossier onder oë kry.”
Anika (17) is in Maart in haar ouerhuis in Theresapark, in die noorde van Pretoria, vermoor en haar hande is ná die moord afgekap. Haar vermeende moordenaar, mnr. Nico Venter, is vroeër in hegtenis geneem by die Carousel-casino waar hy werk, maar is eergister in die landdroshof in Pretoria-Noord op borgtog van R10000 vrygelaat.
Nóg ’n verdagte word in verband met dié grusame moord gesoek.
Lt.kol. Lungelo Dlamini, provinsiale polisiewoordvoerder, het gesê die polisie het ook op ’n mes beslag gelê wat vir forensiese toetse gestuur is om vas te stel of dit in die moord gebruik is.
“Wat wel baie vreemd is, is dat die beskuldigde (Venter) op borgtog vrygelaat is. Bygesê, ek is nie hier om te kritiseer nie, maar dit is vreemd,” het Byleveld gesê nadat hy vereer is met twee eerbewyse vir sy speursuksesse.
“Die tyd sal leer. Hierdie is ook beslis vir my ’n nuwe uitdaging.”
- Volksblad