Allemintige styging in koste van tronk krap LP’s om

Kaapstad

’n Reuse-styging van meer as R600 miljoen in die koste van die nuwe Kimberley-tronk, het parlementslede gister omgekrap.

Die koste van dié “nuwe generasie”-tronk wat 3 000 gevangenes kan huisves, het nie net van R250 miljoen tot R857 miljoen gestyg nie, die konstruksie daarvan is boonop met byna 11 maande vertraag.

Amptenare van die departement van korrektiewe dienste en die departement van openbare werke het gister ’n voorlegging oor die instandhouding van tronke aan die betrokke portefeuljekomitees in die parlement gedoen.

Mnr. James Selfe, DA-LP, het daarop gewys dat die konstruksie van die Kimberley-tronk aansienlik vertraag is en wou weet hoe dit die begroting beïnvloed het.

Mnr. Solomon Malebye, bedryfshoof van die departement van openbare werke, het gesê die koste van dié tronk is nou R830 miljoen.

Die finale infrastruktuurtoets is eergister deur die kontrakteur gedoen. Die tronk sal op 15 Februarie aan die departement oorhandig word.

Malebye het die vertraging toegeskryf aan onder meer swak weersomstandighede, beurtkrag, arbeidsonrus en ’n tekort aan sement en staal die afgelope twee jaar weens bouprojekte wat met die Wêreldbeker-sokkertoernooi verband hou.

Mnr. Albert Fritz, DA-LP, was duidelik gefrustreerd: “Ek wil weet: was dié vertraging bloot weens die staatsdiens se onbevoegdheid? Ek raak kwaad as ek hoor belastingbetalers se geld word so vermors. Kan u dalk ’n beter verduideliking verskaf?”

Malebye het geantwoord die styging in die koste van boumateriaal is ’n realiteit. “Die finale geskatte koste is R830 miljoen, maar ons is gister meegedeel die finale koste sal weens stygings, haakplekke en veranderinge R857 miljoen wees.”

Mnr. Vincent Smith, voorsitter van die portefeuljekomitee oor korrektiewe dienste, het gesê dit kom neer op ’n styging van 260%. Nóg inflasie nóg ’n verhoging in die staalprys kan só ’n styging regverdig.

Hy is ondersteun deur mnr. Salamuddi Abram, ANC-LP, wat gesê het die staat moet dieselfde beginsels as die private sektor gebruik.

“Dit is kommerwekkend dat ’n styging van 260% vir die departement aanvaarbaar is. Dit is nie aanvaarbaar in die private sektor nie en behoort nie aanvaarbaar te wees in die openbare sektor nie.”

Mnr. Robert van Anraad, DKD-kommissaris van geriewe, het gesê die gebrek aan koördinering is dikwels, soos in die geval van die Kimberley-tronk, die oorsaak van vertragings.

- Die Burger