‘Afrikaners het nog kwessies’

Kaapstad

Prof. Jonathan Jansen, rektor van die Universiteit van die Vrystaat, se versoeningsgebaar het gewys Afrikaners moet nog kwessies rondom versoening en skuld behoorlik binne ’n familieraamwerk deurtrap.

Só het dr. Fanie du Toit, uitvoerende hoof van die Instituut van Geregtigheid en Versoening, gister gesê.

Du Toit se uitsprake volg nadat Antjie Krog, bekende skrywer en digter, Bok van Blerk se liedjie “De la Rey” verdedig het.

Hy het gesê ’n deel van die dilemma is dat Afrikaners én wit Engelssprekende Suid-Afrikaners dié kwessies nog nie behoorlik hanteer het nie.

’n Uittreksel uit Krog se toespraak, wat sy vroeër by die Goe­the-instituut in Johannesburg gelewer het, is gister in die Sunday Times gepubliseer. Krog verwys in die toespraak na De la Rey as die “surrogaat-pa wat nie Afrikaners in ’n opmars lei nie, maar hulle eerder help om skuld te verwerk”. Volgens haar som Van Blerk die dilemma mooi op.

Dit is een waarin “ek nie my pa wat apartheid ondersteun, kan kritiseer nie, want ek sien hoe onseker is hy in ’n land wat hy nie meer verstaan of waarin hy welkom voel nie”.

“Ek kan nie die nuwe regering blameer nie, omdat ek verstaan hoe verpletterend rassediskriminasie in die psige van mense kan wees.”

Krog verwys hier na dubbele skuld. Sy het gesê die versoenende gebare van Jansen en oudminister Adriaan Vlok is voorbeelde van hoe daar seker gemaak word niemand spring skaamte of slagofferskap vry nie.

Sy het gesê Afrikaners leef intiem as ’n beskuldigde minderheid saam met die mense wie hulle vroeër mishandel het.

Volgens haar blyk die enigste opsie te wees vir Afrikaners om te sit en wag totdat dié vir wie hulle histories mishandel het, erger word as Afrikaners self en uiteindelik dié historiese behandeling kan regverdig.

Krog meen egter dit is noodsaaklik dat Afrikaners op ’n positiewe en eerbare manier in die herdefiniëring van hulself moet belê.

Volgens Du Toit is hierdie herdefiniëring van Afrikaners en hul rol in die nuwe samelewing uiters belangrik.

- Die Burger