‘Afgryslike politieke bedrieëry’ in soeklig

KAAPSTAD. – Beloofde beleggings van oorsese maatskappye wat staatskontrakte, soos die omstrede wapentransaksie, losgeslaan het, is gister in die parlement as ’n “afgryslike politieke bedrieëry” bestempel.

Tot 65000 werksgeleenthede sou deur die nasionale nywerheidsdeelnameprogram (NIPP), waarvan die wapentransaksie deel was, geskep word.

Die departement van handel en nywerheid (DTI) het egter gister aan die portefeuljekomitee vir handel en nywerheid in die parlement gesê slegs 21393 werksgeleenthede is geskep.

Ferrostaal, ’n Duitse maatskappy wat by die wapentransaksie baat gevind het, sou in ruil vir die transaksie €3miljard (R29,8miljard) in Suid-Afrika belê.

Mnr. David Maynier, DA-LP, het verwys na ’n verslag waarin die DTI te kenne gee dat Ferro­staal al sy beleggingsverpligtinge nagekom het.

’n Ander verslag oor ’n interne ondersoek na bedenklike betalings in Ferrostaal het egter getoon dat die maatskappy slegs 2%, naamlik €62miljoen (R616,8miljoen), van sy beleggingsverpligtinge nagekom het.

“Indien dit waar is, wil ek vra of die departement nie die parlement, komitee en publiek hieroor mislei het nie. Dit is ’n afgryslike politieke bedrieëry.”

Dié onthulling het sekere LP’s so opgewonde gehad dat mnr. Mario Ambrosini, IVP-LP, sy vrabeurt aan Maynier wou afstaan omdat dit “’n kwessie van nasionale belang” is.

Maynier het gesê deel van Ferrostaal se verpligtinge was om €300miljoen (R2,9miljard) in die produksie van die fliek Long Walk to Freedom te belê, maar teen Oktober verlede jaar is net €6miljoen (R59,6miljoen) belê en daar is nog geen fliek nie.

Mnr. Rob Davies, minister van handel en nywerheid, het dié bedrag bevestig. Volgens mnr. Tim Harris, DA-LP, sou die transaksie ook ’n belegging van €501000 (R4,9miljoen) in ’n kondoomfabriek insluit.

- Die Burger