Aarto-verkeerswet sal van April geld

JOHANNESBURG. – Die omstrede Aarto-verkeerswet word op 1April landwyd in werking gestel.

Dít was die boodskap wat die Padverkeersbestuurskorporasie (RTMC) gister aan verkeersowerhede gegee het.

Mnr. Collins Letsoalo, waarnemende uitvoerende hoof van die RTMC, het egter geweier om te sê of dit met of sonder die gevreesde strafpuntstelsel is, wat bestuurders hul rybewys kan kos.

Die Wet op die Administratiewe Beregting van Verkeersmisdrywe (Aarto) is reeds op ’n proefgrondslag in Johannesburg en Pretoria in werking – sonder die strafpuntstelsel – en sal dus van 1April landwyd geld.

Die proeflopies is volgens betrokkenes ’n fiasko.

’n Poging om dit op 1Julie verlede jaar landwyd in te stel, is op die nippertjie laat vaar nadat die metroraad van Kaapstad met regstappe begin het.

Letsoalo het toe gesê dit is ­gedoen om te voorkom dat motoriste se rybewys weens administratiewe gebreke opgeskort word.

Mnr. J.P. Smith, burgemeesterskomiteelid vir veiligheid en sekuriteit, het in reaksie daarop gesê tensy die vroeëre probleme opgelos is, sal Kaapstad die hof nader om Aarto te stuit.

“Aarto het ’n geweldig negatiewe impak op Johannesburg gehad. Padsterftes het toegeneem, terwyl dit twee jaar ná mekaar met meer as 10% gedaal het in Kaapstad, sonder Aarto.”

Smith is skepties oor of die probleme opgelos is, maar sal volgende week met sy Aarto-taakspan vergader, waarna oor stappe besluit sal word.

Mnr. Willie Spies, regsverteenwoordiger van AfriForum, het gesê dié organisasie vrees dat die toepassing van Aarto in dieselfde chaos kan ontaard as die Gautengse toldebakel, want daar is volgens hulle baie ondeurdagte aspekte in dié wet.

AfriForum sal eers oorweeg wat hom te doen staan, het Spies gesê.

Verskeie bronne binne verskeie verkeersowerhede het aan Die Burger gesê munisipaliteite is nie gereed vir Aarto nie.

Letsoalo het egter volgehou die owerhede is slaggereed. Hy was geïrriteerd omdat die inligting uitgelek het.

Volgens hom is die RTMC besig met voorbereidings vir ’n Aarto-spitsberaad in Februarie, waar­tydens die publiek ingelig sal word.

Die enigste uitstaande element voordat Aarto in werking kan tree, is volgens hom die gereedheid van die publiek.

As hy tevrede is dat die publiek weet wat Aarto behels, sal die wet landwyd uitgebrei word.

- Die Burger