Aanklagte in ‘seksslaaf’-saak teruggetrek
2009-11-09 01:38
- Artikelopsies
- Deel
- Kry Die Burger op
Kaapstad. – Die aanklagte teen ’n Duitse man wat na bewering sy vervreemde dogter as ’n seksslaaf aangehou het, is voorlopig teruggetrek.
Die direkteur van openbare vervolging (DOV) in die Wes-Kaap het Vrydag opdrag gegee dat die aanklagte van verkragting teen dié man (54) voorlopig teruggetrek word. Na verneem word, woon die man in Muizenberg.
Die staatsaanklaer, me. Claire Ehrenreich, het in die Muizenberg-landdroshof aan landdros André Maqubu gesê die DOV het opdrag gegee om die aanklagte voorlopig terug te trek omdat die klaer nie meer in Suid-Afrika is nie.
Dít het gevolg nadat die beskuldigde se regsverteenwoordiger, mnr. Martinho van Schalkwyk, betoë aan die DOV gerig het.
Die tienermeisie (18) is reeds in Augustus vanjaar terug na Duitsland, maar indien sy terugkeer na Suid-Afrika, sal haar pa weer aangekla kan word, het Ehrenreich gesê.
Die meisie het glo vroeër vanjaar in Suid-Afrika na haar vervreemde pa kom soek en hy het haar na bewering vir nagenoeg twee maande as ’n seksslaaf aangehou.
- Die Burger