ANC vies oor regter se ‘bruinkoevert’-beslissing

KAAPSTAD.– Die ANC is “ernstig besorg en teleurgesteld” oor regter Bennie Griesel van die Wes-Kaapse hooggeregshof se beslissing om ’n ANC-verslag oor die sogenaamde “bruinkoevert”-skandaal bekend te maak.

Die Independent-mediagroep het ’n aansoek gebring om toegang tot ’n geheime verslag oor ’n ondersoek na mnr. Ebrahim Rasool, destydse Wes-Kaapse premier en deesdae Suid-Afrika se ambassadeur in Amerika, se betrokkenheid by die skandaal.

Twee joernaliste van die Cape Argus is glo ten tyde van Rasool se bewind betaal om gunstig oor hom te berig.

Griesel het Maandag bevind Rasool se aandeel moet weer ondersoek word en het die verslag by sy uitspraak aangeheg.

Dit het die ANC geskok, luidens ’n verklaring wat mnr. Jackson Mthembu, ANC-woordvoerder, uitgereik het.

Griesel het op 30 November gevra om die dokument te sien voor hy sy beslissing maak.

Die ANC sê hy het in goeder trou geglo net Griesel gaan die verslag sien en het ’n afskrif aan hom gegee.

“Die ANC was uiteraard geskok en onthuts toe regter Griesel voortgaan om ’n afskrif van die interne ANC-verslag by sy uitspraak aan te heg, pleks daarvan om die ANC te beveel om dit aan Independent Newspapers te verskaf,” lui die verklaring.

“Deur die verslag aan te heg, het regter Griesel inderdaad die ANC van sy grondwetlike reg tot appèl teen dié beslissing ontneem.”

Die ANC meen die korrekte benadering – “en die een wat ons van ons howe verwag om te volg” – sou gewees het om die ANC te beveel om die verslag aan die applikante te verskaf.

“Dit sou aan die ANC die geleentheid gegee het om sy reg tot appèl in dié sensitiewe en ingewikkelde kwessie uit te oefen,” het Mthembu voortgegaan.

“Die ANC glo die kwessie raak belangrike wetlike en grondwetlike beginsels rakende die reg tot privaatheid en toegang tot inligting aan.”

Die ANC gaan aansoek doen om verlof tot appèl teen die beslissing om “reg te maak wat ons glo ’n fundamenteel gebrekkige benadering is”.

Mthembu het ook gesê die ANC “herbevestig” sy “verbintenis tot regsoewereiniteit en re­spek vir die uitsprake van ons howe”.

- Die Burger