Mosselbaai. – In­wo­ners van hier het vandeesweek teen dwelmgebruik verenig.

Leerders van verskeie skole en hul onderwysers het Maandag onder leiding van mnr. Rudi Laws, die burgemeester van die Eden-distriksmunisipaliteit, van die All Saints-kerk in D’Almeida na die D’Almeida-sportstadion gestap.

Laws het gesê daar moet ’n omvattende, gekoördineerde strategie wees wat armoede, misdaad en dwelms bestry.

Volgens hom moet veilige gemeenskappe geskep word deur armoede en die beskikbaarheid van vuurwapens teen te werk.

“Kinders, julle moet nee sê vir dwelms,” het me. Marie Ferreira, die uitvoerende burgemeester van Mosselbaai, gesê.

“Ek is lief vir julle.”

Volgens ds. Victor van der Ross moet dwelms met wortel en tak uitgeroei word.

Die inisiatief kom van die D’Almeida Civic Association, wat die kwesbaarste lede van die gemeenskap se misnoeë met dwelmmisbruik wou uitspreek.

Lesedi Nuclear Services, ’n hoofkontrakteur by die plaaslike Eskom-aanleg, het die optog geborg.

Die Olympia- skool van Pacaltsdorp sou gisteroggend ’n optog teen misdaad hou, maar dit is uitgestel nadat die George-munisipaliteit nie toestemming daarvoor verleen het nie.

Daar moet ’n maand voor ’n optog toestemming verkry word.