Port Elizabeth. - Die opmerkings van ’n senior dosent aan die Universiteit van KwaZulu-Natal op ’n konferensie in Stellenbosch oor die leke-prediker mnr. Angus Buchan het wye reaksie uitgelok.

Dr. Sarojini Nadar het onder meer op dié tweedaagse konferensie getiteld “Die euwel van patriargie in die kerk, die maatskappy en politiek in Suid-Afrika” beweer dat Buchan se Mighty Men-saamtrekke “die nuwe weergawe van Afrikaner- hegemoniese manlikheid is wat aan’t kop uitsteek is”.

Volgens ds. Stephan Hoffman van die Nederduitsch Hervormde Kerk van Afrika in die Baai is die gedagte dat ’n dosent in die ­teologie ’n vrees by mense oor ’n sogenaamde filosofie van manlike oorheersing wil inboesem, eintlik tragies.

“In ’n land waar daar werklike vrese ten opsigte van fisieke geweld, moord en verkragting bestaan, is dit onnodig om na nog iets te soek om mense mee bang te maak. Ek het gedink ons is al verby die tyd dat teologie onproduktief en bloot reaktief handel oor al die slegte dinge en potensiële gevare wat met angs en bewing vermy moet word.

“Wat van die hoop, liefde, gemeenskap en opbouende gevolge wat Buchan se boodskap meebring?”

Hoffman se stelling word beaam deur ds. Johan Smit van die NG Moedergemeente in Cradock, wat self die Mighty Men-konferensie verlede jaar op Buchan se plaas in Greytown bygewoon het.

“Mense moet onthou hy is nie ’n teoloog nie. Hy is ’n boer. Sy formules is dus nie altyd weldeurdag nie en sy aanbieding daarvan kom nie verpak met ’n netjiese strikkie nie.

“Die kernwaardes wat hy verkondig, is egter van kardinale belang, want hy spreek pa’s aan en omtrent 75% van gesinsprobleme is deesdae ’n pa-probleem.”

Eerw. Luyanda Tuku van die St. Mary’s Anglikaanse kerk in die Baai was heel diplomaties in sy antwoord: “Ek het al van die Mighty Men-saamtrekke gehoor, maar het nog nie self een bygewoon nie. Maar as dit van God afkomstig is, sal dit toeneem in sukses en omgekeerd.”

Buchan was gister weer nie vir kommentaar beskikbaar nie.