Port Elizabeth. - Steytlerville se water krioel met “klein goedjies” en proe bitter. ­Inwoners kla al drie maande lank oor die swak gehalte van die drinkwater, maar sê hul klagtes val op dowe ore.

Selfs gerugte dat mense maagprobleme en diarree ondervind, het die owerhede glo nog nie tot optrede aangespoor nie.

Volgens mnr. Nkoleko Petros, ’n assistent by die dorp se regshulpsentrum, kan hulle nie eers koffie maak met die water nie.

“Die water proe aaklig en dit veroorsaak regtig maagprobleme. Ons ervaar dit al vir ’n paar maande, maar niemand het nog enigiets daaraan gedoen nie.”

Petros sê hy het die probleem in Mei op ’n infrastruktuur-beplanningsvergadering onder die aandag van die Baviaans-munisipaliteit gebring. “Hulle het my belowe dat dit net vir ’n paar weke sal duur, maar die water is nog steeds dieselfde.”

Volgens mnr. Bennie Arends, tegniese bestuurder van die munisipaliteit, is daar niks fout met die watergehalte nie.

“Die water word elke maand getoets en die resultate is altyd gunstig. Ons water is die laaste tyd ’n bietjie bruin, maar dit word veroorsaak omdat ons al die pypleidings in die gebied vervang.”

Hy sê vanaf Julie word die water met chloor behandel om sodoende enige kieme dood te maak. “Die mense is nie gewoond aan die chloor nie, so ek dink dit is waaroor hulle kla.”

Petros voel egter dat die munisipaliteit net verskonings maak.