Port Elizabeth. - Die Oos-Kaapse regering ondervind steeds groot probleme in sy finansiële bestuur, al is daar ook klein verbeteringe te bespeur.

Dit was gister duidelik toe die ouditeur­generaal (OG) se verslag oor die finansiële stand van die Oos-Kaapse regering in Bhisho bekend gemaak is.

Mnr. Mbulelo Sogoni, Oos-Kaapse premier, het gesê die verslag toon ’n 31%-toename in die aantal ongekwalifiseerde ouditmenings in provinsiale staatsdepartemente. Ses departemente het ongekwalifiseerde ouditmenings ontvang, teenoor slegs twee in die vorige boekjaar.

Die departemente wat ongekwalifiseerde menings ontvang het, is die premierskantoor, provinsiale tesourie, openbare werke, veiligheid en sekuriteit, sport, rekreasie, kuns en kultuur en die provinsiale wetgewer.

Luidens ’n verklaring het ongunstige verslae afgeneem van drie in die vorige boekjaar tot twee in dié boekjaar. Gekwalifiseerde ouditmenings het afgeneem van sewe na vyf oor dieselfde tydperk. Die OG-verslag het benadruk pogings moet aangewend word om ’n verandering te bring in die departemente van gesondheid en onderwys, wat weer ongunstige verslae het.

Die departemente van vervoer, behuising en plaaslike regering, landbou, ekonomiese ontwikkeling en omgewingsake en maatskaplike ontwikkeling het almal gekwalifiseerde ouditmenings ontvang.

Luidens ’n verklaring uit die Oos-Kaapse premierskantoor het verskeie faktore bygedra tot verbeterde finansiële bestuur in die provinsie.

Aandag is veral geskenk aan batebestuur aangesien swak bestuur in die verlede aanleiding gegee het tot die meeste gekwalifiseerde verslae, lui die verklaring.