Port Elizabeth. - Die Baaise middestad is gister tot stilstand geruk toe ’n verwoestende brand wat Dinsdagoggend in die Ou Greaterman’s-gebou uitgebreek het oornag opgevlam en nóg ondernemings verswelg het.

Daar is gevrees dat die gebou weens die aard van die skade inmekaar sou stort.

Die intense hitte van die brand het talle mure, ook by die aangrensende gebou in Kempstraat, gister plek-plek laat oopbars en losbreek. Dit huisves ook winkels en stoorkamers. Die 22 brandbestryders aan diens het die gebou natgespuit om ’n verdere brand daar te probeer voorkom.

Noodpersoneel het omliggende winkels gedwing om te sluit weens die rook wat uit die brandende gebou geborrel en ’n rookwolk oor die middestad gevorm het, wat laataand nog sigbaar was.

Die brand het in die snuisterye-winkel Mr Crazy ontstaan en na drie groot winkels in die gebou versprei nadat ’n houtdeur in die gebou vlamgevat het, het mnr. Lourens Schoeman, munisipale woordvoerder, gesê.

“Die brand is verder aangehits deur oorvol pakkamers propvol hout en klere, en vensters en deure wat met bakstene toegebou is.”

Van die omstanders was ontevrede met die brandweer se hantering van die situasie omdat hulle “net van buite water spuit en nie in die gebou ingegaan het nie”.

Mnr. André de Ridder, direkteur van die metro se brandweer- en nooddienste, het egter verduidelik die veiligheid van brand­bestryders kom altyd eerste.

Mnr. Johan Augustyn, eienaar van die ingenieursfirma JA Engineering, het gesê die brandende gebou sal beslis gesloop moet word, berig Samantha van den Berg. “ ’n Gebou wat al vir twee dae brand het nie ’n kans op oorlewing nie.”

Me. Lynn van Niekerk, eiendomsbestuurder vir die eienaar van die gebou – na verneem word dr. S. Bemath – het gesê die redes waarom die gebou se brandsproeiers nie aangegaan het nie, word ondersoek. Die oorsaak van die brand is steeds onbekend.