Port Elizabeth. - ’n Vrou wat na bewering ’n trekker op ’n verlate plaas vir skrootmetaal opgesny en weggery het, het gistermiddag in die Oos-Londense landdroshof verskyn.

Mev. Magda Muller (27) van die Gunobie-woonbuurt het die plaas na bewering Woensdag en Donderdag besoek en sonder toestemming dele van die trekker begin wegry.

Die plaas, Fernville, was glo ’n tyd lank verlate. Intussen het die eienaar besluit om die ou plaashuis af te breek en die plaas op te knap. ’n Isuzu-bakkie en ’n trekker, wat glo nog herstel kon word, het op die plaas gestaan.

Volgens kapt. Steven Marais, ’n polisiewoordvoerder, het die trekker die afgelope twee dae stuk vir stuk verdwyn.

“Die plaaswerkers is glo al die hele week besig om herstelwerk op die plaas te doen, en dit is hulle wat Muller Woensdag die eerste keer gewaar het.”

Volgens Marais het die plaaswerkers die wit Daihatsu-bakkie eerste opgemerk, waarna hulle Muller met ’n vlamsnyer die trekker sien opsny het.

“Die werkers het glo aangeneem dat die plaas­eienaar haar toestemming gegee het.”

Die voorman het kort daarna by die plaas aangekom en Muller met die metaal sien uitry, waarna hy haar agternagesit het en die polisie gebel het.

Volgens Marais het hulle dele van die trekker op Muller se bakkie gekry. “Sy is in hegtenis geneem.”

Die polisie het beslag gelê op die skroot asook die voertuig. Muller is by die Blouwater-polisiekantoor aangehou. “Sy het aan die polisie gesê sy was onder die indruk dat die eienaar al in 2000 oorlede is en dat enigiemand iets op die plaas kon vat,” sê Marais.

Muller is aangekla vir die besit van vermoedelike gesteelde eiendom.

Teen druktyd was dit nie bekend of sy op borgtog vrygelaat is nie.