Oudtshoorn. – Die fietsry-afrigter Leon Schepers (50) van Volmoed het pas Beijing toe gevlieg waar hy sy twee bergfietsryers, die Suid-Afrikaanse vrouekampioen, Yolande Speedy, en Barry Stander, die Suid-Afrikaanse o.23-kampioen, in die bergfietswedren gaan bystaan.

Stander en Speedy is uit ’n oefengroep van agt gekies wat in Oktober verlede jaar vir ses weke ’n toer in Europa onderneem het waar hulle onder meer aan ’n wêreldbyeenkoms deelgeneem en volgens Schepers goeie pre­stasies behaal het.

Suid-Afrika moes volgens Schepers kwalifiseer om na die Olimpiese Spele te gaan.

Bergfiets- en BMX-items is twee van die nuwe sportsoorte wat vanjaar vir die eerste keer by die Olimpiese Spele aangebied word.

“Ek is seker ons gaan met ’n medalje of twee huis toe kom,” het Schepers Woensdag voor sy vertrek gesê.

Die bergfiets-items word op 22 en 23 Augustus gehou en die BMX-wedrenne die volgende dag.

Daar is geen uitdunne nie.

“Dit is ’n uitmergelende wedren en daarom is daar geen uitdunne nie,” het Schepers gesê.

Volgens hom neem dit sowat sewe dae om by die klimaat aan te pas en daarom het die twee spanne vandeesweek vertrek.

Schepers is lid van die Oudtshoorn-fietsryklub en woon die afgelope ses jaar naby die Highgate-volstruisplaas.

Die fietsrygogga het hom meer as 30 jaar gelede gebyt en hy rig reeds 15 jaar lank af.

Hy het in Kanada studeer om afrigter te word.

In Australië het hy gaan kyk hoe lyk hul oefenkampe en het hy saam met die voorste Australiese afrigters gewerk.

Sedert 2004 is hy ’n heeltydse beroeps-fietsryafrigter.

Hy is in 2006 as nasionale bergfietsafrigter aangestel.

Die naelloper Isabel le Roux is Oudtshoorn se ander inwoner wat in Beijing is.