’n Private pikkewyn-rehabilitasiesentrum van R8,1 miljoen wat vir die Kaap Recife-natuurreservaat in dié stad beplan word, laat seevoëlkenners frons. Kundiges vrees dat pikkewyne wat in die sentrum behandel word deur dodelike voëlmalaria besmet en dan as draers van dié siekte in die see vrygelaat kan word.

’n Studie wat in Januarie en Februarie 2004 uitgevoer is deur mnr. Albert Schultz, van die Universiteit van Kaapstad, toon hoewel daar betreklik min malariamuskiete in die omgewing is, is 87,3% van die voëls met voëlmalaria besmet.

Die simptome van voëlmalaria is onder meer anoreksie en braking en in die ergste gevalle ’n skielike dood, sê me. Venessa Strauss, rehabilitasiebestuurder van die Suider-Afrikaanse Stigting vir die Beskerming van Kusvoëls, in Kaapstad.

Juis omdat voëlmalaria so algemeen onder wilde voëls in dié gebied voorkom, het dit vir me. Robin Greyling, ’n kenner van mariene soogdiere en seevoëls by die Bayworld-oseanarium, nie sin om ’n rehabilitasiesentrum daar te bou nie.

“ ’n Groot aantal van die wilde voëls in die omgewing het reeds voëlmalaria; so, die kans is bitter goed dat die pikkewyne in die sentrum ook besmet gaan word.”

Ook me. Trudie Malan, van die Ajubatus-pikkewynrehabilitasiesentrum in Kaap St. Francis, sê pikkewyne kan nie in Kaap Recife gerehabiliteer word as voëlmalaria hul toestand gaan vererger nie.

Die sentrum gaan gebou word danksy ’n skenking van R8,1 miljoen wat Samrec in 2003 van die Uthingo-trust ontvang het. Bouwerk aan die sentrum sal eersdaags begin.

Me. Libby Sharwood, bestuurder van die Suid-Afrikaanse sentrum vir mariene rehabilitasie en opvoeding (Samrec), was duidelik omgekrap toe Die Burger haar om kommentaar genader het.

“Nog voordat ons dit oorweeg het om die sentrum op te rig, het ons baie navorsing gedoen, veral oor voëlmalaria. Oor twee maande (in die malaria-tydperk) is net 26 muskiete gevang, wat beteken die muskiete kom eintlik glad nie daar voor nie.

“Ons kry dikwels pikkewyne in die see wat voëlmalaria het. Hulle moet dit iewers anders optel, want op die oomblik is daar geen pikkewyne by Kaap Recife nie,” het Sharwood gesê.

Sy meen Samrec is deeglik bewus van moontlike gevare in die omgewing, en het verskeie voorsorgmaatreëls getref as die situasie sou vererger.

Sharwood het weer die behoefte aan só ’n rehabilitasiesentrum in die Baai beklemtoon. “Op die oomblik moet siek pikkewyne in ’n motor tot by Kaap St. Francis (se rehabilitasiesentrum) vervoer word. Dít plaas baie spanning op die pikkewyne en is glad nie goed vir hulle nie.”

Greyling meen egter die rehabilitasiesentrum in Kaap St. Francis is voldoende vir die omgewing. Voëlmalaria verskil van die malaria wat mense besmet, sê sy.