Kaapstad. - Italië het gister vir die derde jaar agtereenvolgens padfietsry se wêreldkampioen opgelewer.

Alessandro Ballan het by die tweemalige verdedigende kampioen Paolo Bettini oorgeneem toe hy in Varese, Italië, eerste oor die wenstreep gejaag het.

Nóg ’n Italianer, Damiano Cunego, was tweede met Matti Breschel van Denemarke wat die bronsmedalje verower het.

Nie een van die Suid-Afrikaners het dié wedren voltooi nie.

) Intussen heers daar groot ontevredenheid onder plaaslike fietsryers.

Drie groepe is in gister se wedren in Durbanville – die derde in die Lenteliga – gediskwalifiseer.

Die elite, veterane én vroue se wedrenne is gekanselleer nadat jaers oor die witlyn en aan die regterkant van die pad gery het.

Vir die organiseerder van dié wedren, Liné Griffiths, was dit ’n groot teleurstelling ná baie harde werk.

“Weet jy wat die slegste is? Ons sukkel reeds so om borge te kry vir wedrenne en dan gebeur só iets.

“Ons vra borge om te pryse te oorhandig by die prysuitdeling en dan is daar omtrent nie eens ’n prysuitdeling nie,” het Griffiths gesê.

Die groot probleem lê skynbaar daarin dat die fietsryers en wedrenkommisarisse dié omstrede witlyn-reël met diskresie wil toepas, terwyl die Trapkragvereniging niks daarvan wil weet nie.

Tans is daar groot vrese dat borge – van spanne én die wedrenne – heeltemal gaan onttrek weens al dié probleme.

’n Borg soos Daikin-GU het gister ’n lelike bloutjie geloop. Van sy drie spanne is twee se wedrenne gekanselleer.