Hy is die Lance Amstrong van swem.

Só het David Davies van Brittanje, die silwermedaljewenner in die oopwaterswem-nommer oor 10 km, die wenner, Maarten van der Weijden, beskryf.

Dié Hollander, wat sewe jaar gelede met kanker gediagnoseer is, het Donderdag die marathon-swemitem in ’n tyd van een uur 51 minute en 51.6 sekondes gewen.

Die 27-jarige Van der Weijden het in 2001, dieselfde jaar as wat die Suid-Afrikaner Natalie du Toit haar been in ’n motorongeluk verloor het, gehoor hy ly aan leukemie.

Hy het breinchirurgie ondergaan en het weer in 2003 kompeterend begin swem.

Davies het gesê Van der Weijden in ’n waardige kampioen.

“Hy het ’n ongelooflike storie wat baie mense kan inspireer. Dit was ’n plesier om teen hom mee te ding en sy prestasie is ongelooflik.”

Van der Weijden het gesê hy het die ervaring om kanker te oorwin, gebruik in sy voorbereiding vir Beijing.

“Ek het geweet ek het ’n kans om te wen, en dit het baie druk op my geplaas. Maar ek het gedink aan alles wat ek reeds deurgemaak het en dat ek steeds hier is, en dit is die belangrikste ding.

“Leukemie het my geleer om stap vir stap te dink. Wanneer jy soveel pyn het, wil jy nie aan die volgende dag of week dink nie, jy dink net aan die volgende uur. Ek het geleer om geduldig te wees en het dieselfde strategie gedurende die marathon gebruik.”