Boedapest. – Lewis Hamilton voel ná agtereenvolgende oorwinnings op Silverstone en Hockenheim gemaklik oor sy kanse in môre se Hongaarse Grand Prix.

Volgens dié Brit, wat die voorloper op die Formule Een-punteleer is, het daardie seges gehelp om sy kop “vry” te laat voel in sy jaagtog na sy derde agtereenvolgende oorwinning.

“Die verskil is wanneer jy ’n swak naweek beleef het en dan dink jy ‘goed, kom ons begin oor’ en jy probeer om nie weer dieselfde foute te maak nie,” het Hamilton gesê.

“Maar as jy gewen het, het jy nie sulke gedagtes nie. Jy beplan om net presies dieselfde dinge weer te doen. Jy het nie enige onsekerheid in jou agterkop nie.”

Hamilton kan die eerste renjaer sedert Michael Schumacher in 2006 word om drie Grand Prix’s ná mekaar te wen.

As hy dit regkry, sal hy ook die eerste Brit sedert Damon Hill in 1996 wees wat daarin kon slaag.

“Dit is nie vir my belangrik nie,” het hy gesê. “Natuurlik sal ek daarvan hou om die momentum wat ek het te behou, maar my mikpunt vir dié naweek is net om soveel punte in te samel as wat ek kan.

“As ons die motor het om te wen, sal ek dit probeer doen, maar anders sal dit net lekker wees om op die podium te kom.”

Hamilton se voorbereidings het ’n hupstoot gekry met die ankondiging dat sy McLaren-spanmaat Heikki Kovalainen vir nog ’n jaar by dié span geteken het.

Hamilton het gesê Kovalainen se bydrae het sover vanjaar gehelp om ’n kalmer atmosfeer as verlede jaar te skep.

Verlede jaar is die span deur sy betrokkenheid by ’n spioenasie-skandaal en die onmin tussen Hamilton en sy spanmaat Fernando Alonso ontwrig.

Verlede jaar se wedren in Hongarye was ’n onaangename tydperk vir McLaren met Alonso wat Hamilton se weg tydens die kwalifiserende ronde in die kuipe versper het.

“Dinge verloop vanjaar baie gladder, dis ’n aangename atmosfeer en dit is hoe dit moet wees,” het Hamilton gesê.

Hamilton het verlede jaar wel dié wedren gewen ná Alonso uit die eerste plek by die wegspring na die sesde gestraf is.

“Ek dink ons is as ’n span beter geplaas om vanjaar die kampioenskapsreeks te wen. Ons het nie onnodige bagasie op ons skouers nie en ek het ’n goeie verhouding met my spanmaat, wat help,” het Hamilton gesê.

TV: Môre 13:30 op SS 2 op DStv.