Galle. – Indië se wegbreekbouler Harbhajan Singh het gister hier sy span in die prentjie gehou op die tweede dag van die tweede kriekettoets teen Sri Lanka.

Sri Lanka kolf vanoggend op 215/5 voort nadat Harbhajan 4/71 met sy wegbreke platgetrek het. Sri Lanka is nog 114 lopies agter Indië, wat vir 329 in sy eerste beurt uitgehaal is.

Harbhajan het die paaltjies van Malinda Warnapura (66), Kumar Sangakkara (68), Thilan Samaraweera (14) en Tillakaratne Dilshan (0) ingeoes.

Sri Lanka was op 137/1 in ’n gunstige posisie, maar het die kluts in die laaste sessie teen Harbhajan se akkurate boulwerk kwytgeraak.

Die kaptein, Mahela Jayawardene (46*), en die paaltjiewagter Prasanna Jayawardene (5*) hervat vandag Sri Lanka se eerste beurt. Jayawardene is kort voor die uitskeityd ’n lewe gegun toe ’n vangskoot verbrou is.

Vroeër het Indië se aanvangskolwer Virender Sehwag byna op sy eentjie teen Sri Lanka se nuwe draaiboulheld, Ajantha Mendis (6/117), geveg.

Aan die einde van die kolfbeurt was Sehwag onoorwonne op 201 – sy eerste dubbele honderdtal teen Sri Lanka. Sy kolfbeurt het 22 viere en 4 sesse ingesluit en is van net 231 balle aangeteken.

Toe Mendis die laaste paaltjie ingeoes het, het Sehwag slegs die tweede Indiese kolwer naas Sunil Gavaskar geword wat die hele kolfbeurt voor die paaltjies was.