Port Elizabeth. - Nkosinathi Joyi sal ’n fout maak as hy sy Mexikaanse teenstander vanaand in hul boksgeveg in Mdantsane se binnenshuise sentrum met té min respek benader.

Lorenzo Trejo (31) is ’n veteraan van 47 gevegte waaruit hy baie geleer het.

Hy het wel al 16 keer verloor, maar Joyi moet daarvan kennis neem dat 11 van dié nederlae voor 2000 was.

Sedert 2000 het Trejo se loopbaan ’n dramatiese opwaartse kurwe getoon en het hy net teen gerespekteerde teenstanders verloor.

Hy was al onsuksesvol in vier wêreldtitelgevegte betrokke en het onder andere teen nog ’n Oos-Kapenaar, Hawk Makepula, met punte verloor.

Trejo se bynaam is nie verniet Explosivo nie, hy is ’n gevaarlike kalant.

Luidens berigte kan hy nogal ’n hou vat, hoewel hy twee keer uitgeslaan is en vier keer met tegniese uitklophoue verloor het.

As Joyi sy mini-vlieggewigtitel van die Internasionale Boksorganisasie dus wil behou, moet hy dalk eers sake mooi uitkyk voor hy aanval.

Die Suid-Afrikaner behoort egter te goed en te vinnig vir die uitdager te wees.

Sy broer, Themba Joyi, sal in een van die voorgevegte probeer om die Suid-Afrikaanse junior kapokgewigtitel by Thembelani Phuma af te neem.

’n Voorgeveg waarin Ludumo Galada sy veergewigtitel van die Wêreldboksfederasie teen Pedro Navarette van Mexiko verdedig, kan vir vuurwerk sorg.

TV: Van 21:30 op SABC 2.