Singapoer. – Jeev Milkha Singh van Indië het die “gholf-gode” ’n groot dankie sê belowe toe hy die Singapoer-ope gister hier op dramatiese wyse met een hou gewen het.

Singh en nog twee groot name in die spel, Padraig Harrington van Ierland en Ernie Els van Suid-Afrika, was al drie op koers om dit in ’n valbylstryd uit te spook, toe Harrington én Els hul kanse verbrou het.

Harrington was eerste aan die beurt toe hy ’n sethou van amper 2 m moes inrol. Sy bal het egter regs verbygerol, wat beteken het dat hy een hou agter Singh geëindig het.

Hierna was dit Els se kans. Die Suid-Afrikaner se sethou van net meer as 4 m was goed op koers na die blikkie, maar het toe net om die rand gerol voor dit langsaan tot stilstand gekom het. Hy het ook op 278 geëindig.

Die Indiër het sodoende sy derde titel van die jaar beklink, asook ’n fris wentjek vir sowat R8 miljoen vir sy telling van 277 houe.

Singh behoort nou ook die seisoen bo-aan die geldwennerslys van die Asiatiese reeks af te sluit – ’n prestasie wat hom ’n plek in die Amerikaanse Meesterstoernooi volgende jaar sal verseker.

“Padraig en Ernie het hard in my nek geblaas. Maar die gholfgode was my dié keer genadig, so ek is nogal bly,” het Singh ges.

“Hier teen die einde het ek senuagtig geraak. Toe ek op die laaste putjie aantree, het ek gesien ek het net ’n voorsprong van een hou.

“Gelukkig was my dryfhoue die heel week goed, so ek het ’n driehout geneem en hom gejaag. Dit het gewerk.”

Harrington het ’n groot terugslag op die 16de gehad toe sy bal enkele treë van die vlaggie geland het, maar toe oor die setperk gerol en in die water beland het. Dit het hom twee houe gekos. “Ja, dit was hartverskeurend. Maar dis maar hoe gholf is. Soms is dit ’n spel van sentimeters,” het die Ier gesê.