SYDNEY. – Matt Carraro kry môre die eerste keer in die Waratahs se beginspan speelkans. Dié Australiese rugbyspan pak die Stormers in ’n Super14-wedstryd in Kaapstad.

Carraro neem op linkervleuel by die Wallaby Lote Tuqiri oor, wat na heelagter skuif, berig waratahs.com.au. Sam Norton-Knight is na die plaasvervangerbank gerelegeer.

“Matt het beïndruk toe hy as plaasvervanger speelkans gekry het. Hy verdien om in die beginspan te wees vir die Nuwelandse stryd,” het Ewen McKenzie, die hoofafrigter, gesê.

Met dié veranderinge agterlangs hoop hy om meer spasie te skep en die Stormers se verdediging uit te daag.

“Lote speel in elk geval die meeste van die tyd maar agterlangs. Maar ons hoop om hom vanuit die heelagterposisie nóg meer momentum en beslis meer balbesit te gee.”

Die ervare Timana Tahu maak ook sy terugkeer.

“Ons het ouens wat die laaste paar jaar in Super-eindstryde gespeel het, maar dié kookpot gaan nuut wees vir ’n klomp van die jonger spelers.

“Die feit dat Timana van die plaasvervangerbank opgestuur kan word, gee ons net bietjie meer ervaring,” het McKenzie gesê.

Die span is: Lote Tuqiri, Lachie Turner, Rob Horne, Tom Carter, Matt Carraro, Kurtley Beale, Luke Burgess, Wycliff Palu, Phil Waugh (k), Rocky Elsom, Dan Vickerman, Dean Mumm, Al Baxter, Tatafu Polota-Nau, Benn Robinson. PLAASVERVANGERS: Adam Freier, Sekope Kepu, Will Caldwell, David Lyons, Brett Sheehan, Sam Norton-Knight, Timana Tahu.