KAAPSTAD. – Ajax Cape Town se afrigter, Craig Rosslee, gaan nie dat ’n reistog van 36 uur na Kameroen en terug sy kanse belemmer om die Premierliga-sokkertitel te wen nie.

Die Urban Warriors pak Mount Cameroon Sondag in die spanne se tweede wedstryd van hul Konfederasiebeker-kragmeting in Kameroen.

Ná dié wedstryd kom Ajax CT eers Dinsdag in die Kaap aan. Dit is net twee dae voor die belangrike derby teen Santos, wat Donderdag in die Athlone-stadion plaasvind.

Om dié rede het Rosslee besluit om ’n tweede span te kies om die uitdagende reis na Kameroen te onderneem. Dié span het gisteroggend om 06:00 vertrek.

Die Kapenaars het egter die voordeel dat hulle die eerste wedstryd met 5-1 in die Athlone-stadion gewen het. Die Kameroense span moet die tweede wedstryd met minstens 4-0 wen om Ajax CT te troef.

Rosslee het gesê hy gaan net vyf spelers van die span wat AmaZulu Woensdagaand met 3-0 afgeransel het, saamneem.

Ajax CT is nou weer bo-aan die Premierliga-puntelys met 50 punte, maar het een wedstryd meer as SuperSport United gespeel, wat op 48 punte in die tweede plek is. SuperSport het egter môre ’n moeilike wedstryd teen Moroka Swallows in die Germiston-stadion.

Santos is vierde en is gelyk met Mamelodi Sundowns op 44 punte. Die People’s Team het egter ’n wedstryd minder as Sundowns gespeel en kan weer die derde plek terugkry as hy môre die sukkelende Thanda Royal Zulu verslaan.

“Die reis is ’n verskriklike een en ons het besluit om die meeste van ons sleutelspelers die wedstryd in Kameroen te laat misloop,” het Rosslee gesê.

“Ons gaan dieselfde span laat speel wat in die laaste wedstryd in aksie was. Die spelers het hulle goed van hul taak gekwyt en dit sal goeie ondervinding vir hulle wees.”

Ajax CT het eergisteraand sy titel-drome lewendig gehou met ’n klinkende sege oor die KwaZulu-Natallers. Dit was baie beter as hul flouerige vertoning verlede week teen Mamelodi Sundowns.

Ajax CT het meer vorentoe gespeel en het sy doelskieters met puik aangeewerk in spel gebring.

“Ek dink Sundowns het nie genoeg krediet vir daardie sege gekry nie. Hulle het baie goed gespeel,” het Rosslee gesê.

“Ons was egter baie vrot. Ek was teleurgesteld omdat ons só gou tou opgegooi en nie karakter getoon het nie.

“Vanaand (Woensdag) se vertoning was baie goed en die manne het vergoed vir verlede week se glips.”