KAAPSTAD. – Die Stormers sê altyd dat hulle beheer wat hulle kan, maar het darem nie nagelaat om die Bulls te bedank vir Saterdag se oorwinning oor die Waratahs in Pretoria nie.

“Die Bulls bly ’n baie goeie span en hulle is besig om selfvertroue op te tel. Hulle het die Waratahs in die reën op Loftus verslaan. Ons bedank hulle daarvoor, maar ons taak is nou om ons laaste twee wedstryde te wen,” het die Stormers se afrigter, Rassie Erasmus, ná Saterdag se oorwinning van 20-10 oor die Brumbies op Nuweland gesê.

Die Bulls se sege van 16-13 oor die Waratahs het die Stormers se hand op ’n moontlike tuis-halfeindstryd verstewig.

Erasmus se span speel Saterdag op Nuweland teen die Waratahs in ’n wedstryd wat van kritieke belang is vir albei spanne se ambisies. Die Waratahs is weens hul nederlaag slegs twee punte voor die Stormers.

Daarna is die Stormers se enigste oorblywende wedstryd voor ’n moontlike halfeindstryd teen die Lions op Ellispark.

Die Stormers is vierde op die puntelys en is nou Suid-Afrika se beste kans om vir die halfeindronde te kwalifiseer. Nietemin sal hulle ook hoop die Western Force kan Vrydag die Hurricanes klop.

Laasgenoemde kan tussen die Stormers en ’n halfeindstryd op Nuweland staan.

Die Sharks se nederlaag teen die Crusaders het hul taak erg bemoeilik.

Hoewel Dick Muir se span die gunsteling sal wees om Saterdag met die Cheetahs in Durban af te reken, is dit ’n derby – iets wat soms ’n gelykmakende faktor kan wees.

“Die Cheetahs kan op enige dag ’n ander span klop,” het Erasmus gesê.

Die Sharks se ander oorblywende wedstryd is teen die Chiefs, wat ook nog onder die aanspraakmakers tel en die skietgoed het om vandeesweek met die Lions af te reken.

“Die volgende twee weke gaan baie interessant wees. Daar is heelwat spanne wat nog ’n aanspraak op ’n plek in die halfeindronde het,” het die Brumbies se kaptein, Stirling Mortlock, gesê.

Die Brumbies is ná hul eerste nederlaag op Nuweland sedert 1998 nie meer een van hulle nie. Hul afrigter, Laurie Fisher, het gesê hulle sal alles in die stryd werp om hul laaste twee wedstryde teen die Bulls en Force te wen.