PRETORIA. – Derick Hougaard se Super14-rugbyseisoen is verby en daar is boonop ook ’n sterk moontlikheid dat Wikus van Heerden nie Saterdag vir die Bulls teen die Cheetahs in Bloemfontein sal speel nie.

Die sweer in Hougaard se boudspier het nog nie genoeg herstel nie en hy sal volgens die spandokter, Tommie Smook, nie vir die stryd met die Cheetahs oorweeg word nie.

Hougaard kon om dieselfde rede ook nie teen die Brumbies speel nie.

“Dit is belangrik dat Derick se gesondheid voorkeur kry en ons hom nou die kans gee om heeltemal te herstel voordat die Curriebeker-reeks begin.

“Ek kan ook nie ontken dat Wikus dalk nie sal speel nie.

“Hy het in die wedstryd teen die Brumbies ’n skop op die knie gekry.

“Dit was gister nog baie geswel en ook in sy geval sal ons geen kanse waag nie, veral nie in die laaste wedstryd van die seisoen nie,” het Smook bygevoeg.

Die nuus oor Hougaard is nie net vir die Bulls nie, maar ook die Blou Bulle ’n groot slag.

Alles dui daarop dat Burton Francis soos teen die Brumbies weer die plaasvervanger-losskakel sal wees en hy sal gevolglik nie in die Vodacombeker-eindstryd teen die Vrystaat-Cheetahs Vrydagaand op Loftus Versfeld speel nie.

Francis was die hele seisoen die Bulle se groot staatmaker in die nommer10-trui en een van die Vodacombeker-reeks se voorste puntemakers.

Hy het 95 punte aangeteken en is tans in die derde plek.

Buiten Hougaard en Van Heerden was die nuus oor die ander Bulls-beseerdes en -olikes bemoedigend.

Bakkies Botha, Deon Stegmann, JP Nel en Zane Kirchner behoort almal teen die Cheetahs te speel.

Frans Ludeke, die Bulls se afrigter, het gewaarsku dat die Cheetahs ondanks hul voorlaaste plek op die puntelys steeds gedugte teenstanders sal wees.

“Ons sal niks op ’n skinkbord kry nie, maar met die oog op die Curriebeker-reeks is dit belangrik om die momentum te behou wat ons met die agtereenvolgende seges oor die Highlanders, Waratahs en Brumbies opgebou het,” het Ludeke gesê.