BLOEMFONTEIN. – Twee spanne, wat kwaai in die knyp is, baklei Vrydagaand vir een staanplek in die Super 14-ry wanneer die Cheetahs en die Highlanders hier op Vodacompark kragte meet.

Wanneer Juan Smith (Cheetah-kaptein) en Craig Newby (Highlanders-kaptein) hul troepe vanaand op die veld lei, is ’n nederlaag nie ter sprake vir een van die twee kapteins nie.

Die laaste plek op die Super 14-puntelys is soos ’n blaffende hond aan dié twee spanne (albei 11 ligapunte) se enkels, met slegs die Lions wat tans minder ligapunte het.

Daarom kan daar verwag word dat albei spanne vanaand ’n reg-of-weg-benadering tot die wedstryd sal volg

Die Cheetahs se laaste twee wedstryde wat wag, teen die Sharks en die Bulls, en die Highlanders se oorblywende kragmetings met die Blues en die Crusaders, sal ’n selfs steiler bult wees om te klim vir die span wat vanaand verloor.

Vir die Cheetahs is daar baie afdelings waarop hulle moet verbeter om ’n herhaling van hul nederlaag teen die Hurricanes vry te spring.

Dit sal voorlangs begin waar die Cheetahs sal baat vind deur die klem op hul sterk punt, hul agttal, te lê.

Die Bok-stut CJ van der Linde sal in die skrums teen die belowende Jamie MacKintosh van die Highlanders te staan kom.

Van der Linde sal die plaaslike rugbypubliek wil herinner waarom hy wêreldwyd agting het, terwyl Heinrich Brüssow en Duanne Vermeulen van hul vroeëre vertonings in die reeks moet herhaal om Smith in die losstryd te steun.

Die spanne is:

Cheetahs : Hennie Daniller, Eddie Fredericks, JW Jonker, Meyer Bosman, Jongi Nokwe, Conrad Barnard, Noel Oelschig, Duanne Vermeulen, Juan Smith (k), Heinrich Brüssow, Barend Pieterse, Rory Duncan, CJ van der Linde, Adriaan Strauss, Wian du Preez. PLAASVERVANGERS: Richardt Strauss, Bees Roux, David de Villiers, Hendro Scholtz, Tewis de Bruyn, Bevin Fortuin, Hendrik Meyer.

Highlanders : Paul Williams, Matt Saunders, Brett Mather, Johnny Leota, Fetu’u Vainikolo; Mike Delany, Toby Morland, Craig Newby (k), Tim Boys, Adam Thomson, Tom Donnelly, Hoani MacDonald, Clint Newland, David Hall/Jason MacDonald, Jamie MacKintosh. PLAASVERVANGERS: Jason MacDonald/David Hall, Chris King, Hayden Triggs, George Naoupu, Jimmy Cowan, Blair Stewart, Aaron Bancroft.

Skeidsregter: Paul Marks (Aus).

Afskop: 19:00.