KAAPSTAD. – Die atmosfeer by die nuuskonferensie was meer gepas vir ’n begrafnis as ’n span wat sy sesde wedstryd uit die laaste sewe gewen het, maar miskien stel dit juis die era van Rassie Erasmus se afrigting by die Stormers in perspektief.

Sy span het die Highlanders Saterdag ná ’n moeilike eerste helfte met 26-16 in ’n Super14-rugbywedstryd verslaan.

Die Stormers kon egter nie ’n bonuspunt vir vier drieë insamel nie en het in die proses die puik flank Schalk Burger weens ’n besering vir die res van hul veldtog verloor.

Erasmus het sy lot oor Burger sonder ’n gekerm aanvaar, maar dit sal moeilik wees om die gaping toe te stop.

“Pieter Myburgh kan hom moontlik (as plaasvervanger) by ons aansluit,” het Erasmus gesê.

Die Stormers sal vandag ook hoor hoe ernstig die besering aan die losskakel Tony Brown se ribbes is. Hy sal vandag vir ’n skandering gaan.

Brown het in die eerste helfte drie strafdoele oorgeklits voordat hy deur Peter Grant vervang is. Grant het tydens die wedstryd sy skouer beseer, maar deur die pyngrens gespeel.

Albei losskakels kan vandeesweek fiks wees.

Conrad Jantjes en Joe Pietersen kan in ’n noodsituasie op losskakel diens doen. Isma-eel Dollie kan ook uit die Vodacombeker-span nadergetrek word, hoewel hy agter die ander kandidate in die ry blyk te wees.

Erasmus het erken hy het ’n paar moeilike besluite om te neem voor Saterdag se wedstryd teen die Brumbies op Nuweland.

“Ons kan moontlik met Brian Mujati op loskopstut begin. Die beserings kan ’n rol in ons besluite speel,” het hy gesê.

Erasmus was tevrede met die vertoning teen die Highlanders.

“Ons het in die tweede helfte goed vir veldgebied gespeel, en die bal goed behou. Daar was nie ’n gebrek aan entoesiasme, passie of deursettingsvermoë nie. Ons was dalk nie klinies genoeg nie,” het hy gesê.

“Daar was ouens wat werklik speelkans benodig het. Niemand het gedink dinge sou in die eerste helfte seepglad verloop nie.”

Die Stormers se kaptein, Jean de Villiers, het ook die saak in perspektief gestel.

“Verlede jaar sou ons eenvoudig met ’n oorwinning tevrede gewees het. Nou is ons ongelukkig dat ons nie die bonuspunt gekry het nie. Ons is op die regte pad.”