HAMILTON. – Die Chiefs het onder die voorste vier spanne in die Super14-rugbyreeks opgeskuif ná hul sege met 32-20 Saterdag hier oor die Reds.

Die Chiefs het hul vierde drie laat in die wedstryd gedruk om ’n voltal van vyf ligapunte te verseker. Dit was hulle vyfde sege agtereenvolgens in dié reeks.

Die Chiefs, wat die Crusaders op verrassende wyse in hul vorige wedstryd geklop het, het vol vertroue teen die Reds begin en was reeds met 24-3 voor met die rustyd.

Die Reds het die gaping vernou (24-20) in die tweede helfte voordat die tuisspan die storm afgeweer het om die wedstryd te beklink.

Die losskakel Stephen Donald was weer die Chiefs se generaal. Hy het vroeër gesukkel in die reeks, maar handhaaf nou die beste peil van al die losskakels in Nieu-Seeland.

Hy het ’n drie gedruk en met drie doelskoppe en twee strafdoele geslaag vir ’n bydrae van 17 punte.

Puntemakers: CHIEFS 32 (24) - Drieë: Leila Masaga (2), Stephen Donald, Sione Laukaki. Doelskoppe: Donald (3). Strafdoele: Donald (2); REDS 20 (3) - Drieë: Morgan Tuirinui (2), Digby Ioane. Doelskop: Clinton Schifcofske. Skepdoel: Berick Barnes .