ATLETIEKKENNERS is dit eens: In Elzaan Mostert en Ruan Maree, talentvolle jong atlete van die Bellville-klub, beskik die Kaap oor ’n tweetal jong gewigstoters wat vorentoe nog diep spore in dié nommer op nasionale én internasionale gebied kan trap.

Elzaan, ’n leerling aan die Hoërskool Tygerberg, se gewigstootloopbaan het in 2003 op dreef gekom toe sy, as o.13-atleet, ingesluit is in die WP-span vir die nasionale laerskolebyeenkoms. As hoërskoolatleet het sy elke jaar die skool se rekordboeke in dié nommer oorgeskryf.

Vanjaar het Elzaan op haar prestasies van die voorafgaande jare voortgebou. Verlede maand het sy die WP junior én skoletitel gewen en haar beste afstand (13,38 m) geëwenaar. Sy het dit, weer in Bellville, met ’n goue medalje op die Wes-Kaapse skolebyeenkoms met ’n afstand van 13,24 m, opgevolg. Sy het die seël op ’n baie suksesvolle seisoen geplaas deur die nasionale skoletitel met ’n puik persoonlike beste afstand van 13,46 m op Rustenburg te verower.

In 2006 en 2007 was sy lid van ’n Suid-Afrikaanse span wat aan ’n internasionale byeenkoms in Botswana deelgeneem het. Verlede jaar het sy ook die Suid-Afrikaanse span gehaal wat aan die Wêreld-jeugbyeenkoms in die Tsjeggiese Republiek deelgeneem het.

Ruan, ’n leerling aan die Hoër Jongenskool Paarl, het in 2004 sy WP-kleure as laerskoolatleet verwerf. Verlede jaar het hy sy persoonlike beste afstand van 16,60 m met die 4 kg-gewig behaal.

Vanjaar skryf hy sowel die WP- as die Bolandse skoletitel agter sy naam het hy in Bloemfontein ’n prestasie gelewer wat kenners verstom het. Op die Hoërskool Sentraal se jaarlikse Top-20-byeenkoms het dié gespierde jong kragman losgetrek met ’n wenafstand van 18,10 m. Dit het nie net die byeenkomsrekord oortref nie, maar is ook ’n afstand van wêreldgehalte.

Nadat Ruan ook as Wes-Kaapse s.o.15-kampioen gekroon is, het hy verlede maand die bronsmedalje met ’n afstand van 16,83 m op vanjaar se nasionale hoërskolebyeenkoms in Rustenburg gewen.

Albei dié jong sterre se talente word by die Bellville-klub deur die bekende afrigter Elize Engelbrecht geslyp.