DIE eerste meisietennisspan van die Hoërskool Bellville het skitterend gepresteer deur die Westelike Provinsie se premierliga-seisoen onoorwonne af te sluit. Dit was ook die eerste keer dat die skool in die Premierliga speel.

Soret Nel (no. 1) en Madalé Bezuidenhout (no. 2), saam met Marzanne Kriek, Tanya Mahs en Tinneke van Zyl (om die beurt no. 3 en 4) was die spelers wat so puik vir Bellville gespeel het.

Die span het afgereken met hul uitdagers van Reddam House, Herschel, Rustenburg en Stellenberg. 

Hoewel hul kragmetings met Bergvliet, Stellenberg en Rustenburg gelykop geëindig het, was Bellville die wenner omdat sy eerste dubbelpaar hul wedstryde gewen het.

Soret en Madalé was dié seisoen, waartydens hulle nie ’n enkele enkel- óf dubbelspelnederlaag gely het nie, die span se twee groot steunpilare. Albei dié twee blink sterre was saam met Tinneke lede van die Westelike Provinsie verteenwoordigende spanne. Soret word by die Handrie Westman-skool afgerig, terwyl Madalé, Marzanne en Tanya uit Jan van Dyk se stal kom. Soret is ’n lid van haar skool se o.19A-hokkiespan, terwyl Tanya, Madalé en Tinneke ook kranige netbalspelers is.