JONG swemmers van die Wes-Kaap het hul klas getoon in die nasionale swemgala wat in Durban plaasgevind het.

In die afdeling vir mans was die twee 17-jariges, Sebastien Rousseau en Heerden Herman, die Kaap se twee blinkste sterre. Rousseau het ’n Afrika-rekord en Olimpiese kwalifiserende tyd in die 200 m-vlinderslag behaal, wat hy in 1:58.03 gewen het.

Herman is as kampioen gekroon in die 800 m-vryslag waarin hy ’n tyd van 8:11.66 aangeteken het. In die 1 500 m-vryslag het hy tweede in 15:17.31 geëindig.

Die Wes-Kapenaar Rousseau Kluever (18) was die naaswenner in die 200 m-vlinderslag.

Ook die 19-jariges Morné Boshoff (derde in 4:30.89 in die 400 m-individuele wisselslag) en James Faure, derde in sowel die 200 m-vlinderslag (2:03.47) as die 800 m-vryslag (8:22.51), het blink vertoon.

In die vrouenommers het Jessica Pengelly (16) en Wendy Trott (18) hul gebruiklike kwota skitter-vertonings gelewer.

Pengelly het met ’n Suid-Afrikaanse rekord en ’n Olimpiese kwalifiserende tyd van 2:16.31 koning gekraai in die 200 m- individuele wisselslag. Ook in die 400 m- individuele wisselslag het sy haar eie Suid-Afrikaanse rekord van 4:41.39 na 4:41.35 laat krimp.

Trott was baas in die 800 m- en 1500 m-vryslag. In die 1500 m het sy ook die Suid-Afrikaanse en Afrika-rekord oortref.

Trott het ook in 4:08.88 ’n tweede plek in die 400 m-vryslag behaal, wat beter is as die Olimpiese kwalifiserende tyd van 4:11.26 en die Afrika-rekord van 4:11.66.

Christy Lategan (17) het ’n derde plek in 2:14.84 in die 200 m-vlinderslag behaal, terwyl die 15-jarige Dominique Dryding in die 1 500 m-vryslag die bronsmedalje verower het. Shannon van Konynenburg (16) was vierde in 1:06.32 in die 100 m-rugslag, met Yolandi van der Merwe (17) ook vierde in 1:13.16 in die 100 m-borsslag.