PAARL GIMNASIUM en SACS se o.19A-rugbyspanne sal in die komende seisoen goed dopgehou moet word. Hierdie spanne het met puik spel die kollig gesteel op die WP-hoër­skole-rugbydag wat op Nuweland gehou is.

Paarl Gim is aanvanklik goed in toom gehou deur Bishops sodat die spanne met rustyd nog gelyk getrek het.

Maar die fikser Paarl Gim-span het hul balbesit in die tweede helfte uitstekend benut en met 20–5 gewen (geen skoppe na die pale word toegelaat in hierdie toernooi nie).

Nadat SACS verlede seisoen ’n sterk oplewing getoon het in die WP se o.19-liga, het hulle hierop voortgebou toe die SACS-span vir Bellville HTS met 30–0 verslaan het.

Bellville HTS het glad nie sleg vertoon nie, maar die SACS-span het heeltemal te veel skietgoed vir hul teenstanders gehad.

Paarl HJS en Rondebosch het met 10–10 die louere gedeel, terwyl Brackenfell en DF Malan eweneens goed opgeweeg het en met dieselfde telling gelykop gespeel het.

Die Hoërskool Strand se voorspelers was te sterk vir die Tygerberg-klub, wat nog nie op volle sterkte was nie, en het met 15–10 gewen.

Die driedrukkers was:

HJS Paarl 10, Rondebosch 10: HJSP – Lincoln Hugh (vleuel, 2). Rondebosch – Josh Carew (stut), Chad Matthews (slot).

Paarl Gim 20, Bishops 5. Paarl Gim – Helmut Lehmann (agsteman, 2), Jaco Pretorius (vleuel, 2). Bishops – Chezré Arendse (vleuel).

Sacs 30, Bellville HTS 0. SACS – Chad Moolman (senter, 2), Robert Herring, Dugald Robertson (flanke), Jonathan Deenik (agtsteman), Aaron Jacobs (heelagter).

DF Malan 10, Brackenfell 10. DF Malan - Jacques Rous (heelagter), Nico Brits (vleuel). Brackenfell – Dane Paterson (vleuel), Boeta Kleinhans (stut).

Strand 15, Tygerberg-klub 10. Strand – Darius van Greunen (vleuel, 2), Altus van Dyk (skrumskakel). Tygerberg-klub – Maurice van Wyk (vleuel, 2).