DIE twaalfjarige Jessica Liss van die Laerskool St. George in Port Elizabeth het in die onlangse Samsung-swemgala in Kaapstad weer eens bewys dat sy een van die topswemmers in Suid-Afrika is.

Dié byeenkoms het op 23 en 24 Februarie by die Universiteit van Wes-Kaapland plaasgevind.

Jessica het die 800 m-vryslag in ’n tyd van 9:11,08 gewen, met Dominique Dryding (WP) in die tweede plek in ’n tyd van 9:20,93 en Kirsten Mouwer (KZN) derde in 9:25,01.

Die OP-swemsensasie het die 100 m-borsslag in 1:11,66 gewen en ook die 200 m-borsslag in 2:30,17 gewen.

Jessica se sterkste teenstanders in die 400 m-wisselslag was WP se Jessica Pengelly (16) en Kathryn Meaklim (KZN).

Jessica het die stryd teen dié twee teenstanders verloor en derde geëindig in ’n tyd van 4:53,77. Jessica Pengelly het gewen in 4:41,94, wat haar vorige rekord van 4:43,76 verbeter.

Karhryn Meaklim was in die tweede plek in 4:45,41.

FRANS DU TOIT berig: DIE skitterprestasies van die 16-jarige Wes-Kaapse swemmer Jessica Pengelly in die Samsung Grand Prix-reeks-gala in Bellville-Suid het die hoop laat opvlam dat Suid-Afrika vanjaar op die Olimpiese Spele in China ’n deurbraak in dié sport kan maak.

Pengelly het in twee nommers, die 400 m-individuele wisselslag, wat sy in 4:41.94 afgelê het, en die 200 m-individuele wisselslag, waarin sy ’n tyd van 2:16.41 behaal het, die nasionale rekords oortref.

In die 400 m-wisselslag het dié Somerset-Wesser nou reeds vier maal die Olimpiese kwalifiserende standaard van 4:45.08 oortref.

By hierdie prestasies het Pengelly eerste plekke in die 200 m-rugslag (2:15.73) en die 400 m-vryslag (4:22.71) asook ’n derde plek in die 100 m-vryslag (59.27 sek) gevoeg.

Die jong WP-swemmer Do­mi­nique Dryding het twee tweede plekke behaal, naamlik in die 400 m- (4:33.08) en die 800 m-vryslag (9:20.93). Derde plekke is behaal deur Arné van Rensburg (100 m-vlinderslag in 68:17 sek.), Jessica Ashley-Cooper (100 m-rugslag in 66.87 sek.), Liezl Burger (50 m-vryslag in 27.56 sek.) en Caitlin Kat (400 m-vryslag in 4:35.26).

In die nommers vir mans het die WP-swemmers Heerden Herman en Sebastien Rousseau hul gebruiklike kwota goeie vertonings gelewer. Herman het die louere ingeoes in die 400 m- (3:59.62) en die 1 500 m-vryslag (15:29.72). In albei nommers was James Faure van die WP tweede in onderskeidelik 4:08.81 en 16:30.71.

Rousseau was in 2:01.70 die wenner van die 200 m-vlinderslag. Hy het ook in 52.57 derde geëindig in die 100 m-vryslag. Derde plekke is ook behaal deur die jong WP-swemmers Jacques de Villiers (100 m-borsslag in 67.31 sek.), Rousseau Kluever (200 m-vlinderslag in 2:05.16) en Chris King (200 m-rugslag in 2:07.78).