DIE Spar Wedloop vir Vroue, wat op 13 April by die Bellville-stadion plaasvind, maak voorsiening vir vroue van alle fiksheidsvlakke deur twee roetes aan te bied wat deelnemers kan stap of draf. Dit kos R40 om in te skryf vir die 10 km-roete en R35 vir die 5 km-roete.

Vir die meer ervare deelnemers wat ’n groter uitdaging soek, het Spar ’n hele reeks Grand Prix-wedlope deur die jaar georganiseer. Hierdie reeks laat vroue punte aanteken oor ’n reeks van vyf wedlope. Hulle hoef nie aan al vyf wedlope deel te neem nie, maar hoe meer hulle deelneem, hoe meer punte teken hulle aan. Die eerste been van die Grand Prix-reeks vind in Kaapstad plaas. Dit word gevolg deur ’n wedloop in Port Elizabeth op 3 Mei, in Durban op 22 Junie, in Pretoria op 30 Augustus en in Johannesburg op 12 Oktober.

Die eerste 10 000 inskrywings vir die Kaapse been van dié wedloop kry elkeen ’n geskenkpak vol verrassings en ’n gratis T-hemp van Spar. Daar is ook nog hope ander pryse op die spel by die prysuitdelingseremonie na afloop van die wedloop. Die grootste prys is ’n splinternuwe Volkswagen Tenaciti waarvoor enigeen wat by die prysuitdeling teenwoordig is, kwalifiseer.

Inskryfvorms is beskikbaar by alle Kwikspar-, Spar- en Superspar-winkels. Deelnemers kan ook binne die volgende uitgesoekte Superspar-winkels inskryf: Aurora, Parklands, Kuilsrivier, Sonstraal, Plattekloof, Seepunt, Die Boord, Belhar, Welgedacht, Rosmead en Elite.

Om meer uit te vind oor die wedloop of om aanlyn in te skryf, besoek www.spar.co.za of skakel Westelike Provinsie Atletiek by 071 100 7141 of 071 100 7135.