KAAPSTAD. – Kaapse rugby kook!

En Rob Wagner, besturende direkteur van WP Rugby (Edms.) Bpk., wil graag Maandag se Varsitybeker-eindstryd tussen Ikeys en Maties op Nuweland aanbied.

Albei dié Kaapse universiteite het gister na die eindstryd deurgedring ná oorwinnings in hul onderskeie halfeindstryde. Eers het Ikeys van 10-31 af teruggeveg om die Pukke met 32-31 te verslaan. Maties het daarna bykomende tyd nodig gehad om vir Tukkies met 47-44 op Stellenbosch te klop.

“Ek stel beslis belang om die eindstryd op Nuweland aan te bied. Indien Ikeys (wat tuisveldvoordeel het) my daaroor sou nader, sou ek dit beslis oorweeg,” het Wagner gisteraand gesê.

Met die Westelike Provinsie wat verlede jaar die nasionale o.19- en o.21-titels ingepalm het, die Vodacombeker-span wat onoorwonne is en die Stormers wat puik vertoon in die Super14-reeks, is dit duidelik dat rugby in die Kaap kerngesond is.

Tukkies was op ’n tydstip in die tweede helfte met 13-28 agter, maar het puik teruggeveg. Dit het gelyk of die Maties se Henoe Stoffberg se onderskepdrie beslissend sou wees, maar ’n drie in die doodsnikke vir Tukkies deur die regtervleuel, Oscar Mfundise, wat puik verdoel is deur die skrumskakel, Joey Mongalo, het die telling 44-44 gemaak.

Stoffberg (regtervleuel) het egter met sy tweede poging pale toe in die tweede helfte van bykomende tyd die beslissende strafdoel oorgeklits.

Vroeër het Ikeys se losskakel, Matthew Rosslee, die wenpunte met ’n strafdoel reg aan die einde op die Groote Schuur-veld in Kaapstad behaal.

Dit ná die Pukke met die halftyd met 23-10 en 20 minute voor die einde nog met 31-10 voorgeloop het.

Maar 16 minute voor die einde het die Ikeys se plaasvervanger-haker Mark Goosen deurgebars vir ’n drie om sy span weer hoop te gee.

Toe volg puik drieë deur die Ikey-vleuels, Marcello Sampson en Matthew Turner, en skielik was dit tyd om naels te kou. Net voor Rosslee sy wenskop oorgesit het, is hy ’n slag hard geloop en het hy op die veld naar geword. Hy het egter sy span se veggees vergestalt met ’n koelkop-houding en die wedstryd beklink.

Puntemakers:

MATIES 47(21) – Drieë: Jean Stemmet, Jonathan Adendorf, Sarel Potgieter, Wilhelm Koch, Henoe Stoffberg. Doelskoppe: Henoe Stoffberg (5). Strafdoele: Stoffberg (4).

TUKKIES 44(13) – Drieë: Gert Lubbe, Kruger van Heerden (2), Gerhard van den Heever (2), Oscar Mfundise. Doelskop: Chandre Boshoff (3), Joey Mongalo. Strafdoele: Boshoff (2).

IKEYS 32 (10) – Drieë: Matthew Turner (2), Mark Goosen, Marcello Sampson. Doelskoppe: Matthew Roslee (3). Strafdoele: Rosslee (2).

PUKKE 31 (23) – Drieë: Lolo Waqa (2), Jean Tiedt. Doelskoppe: Tiedt (2). Strafdoele: Tiedt (4). – Stephen Nell en Michael Green