Die rugbyspan van die Pukke het gisteraand sy FNB Varsitybeker-wedstryd in die Fanie du Toit-stadion in Potchefstroom ten spyte van ’n driekuns aan drieë deur die Maties se kaptein, Wesley Wilkens, gewen.

Die eindtelling was 31-24 vir die Pukke ná hulle met die rustyd met 15-7 voor was.

Maar dit was so amper of Wilkens en sy vegtende Maties het met die Pukke gedoen wat die Tukkies ’n paar weke gelede met die Maroentruie gemaak het.

Toe was dit die Tukkies wat ’n groot agterstand uitgewis het om ’n gelykop-uitslag af te dwing.

Wel, gisteraand was dit die Maties wat aanhoudend aangeval het in die laaste minute en bitter naby aan die gelykmakende punte gekom het.

Die kragmeting was nie altyd so opwindend soos in daardie laaste minute nie.

Vir die grootste gedeelte van die wedstryd was dit die Pukke wat oorheers het en die druk meedoënloos op die Kapenaars uitgeoefen het.

Van sprankelrugby was daar aan albei kante bra min te sien, maar dit was dalk veral omdat altwee spanne so kwaai verdedig het.

Met klipharde duikslae van albei kante en monster-skrumwerk van die Maties, het die spel soms meer na rofstoei gelyk.

Puntemakers:

PUKKE 31 (15) – Drieë: Lolo Waka, Nelis Nel, Stoffel Duvenhage. Doelskoppe: Corne Meyer (2). Strafdoele: Meyer (4).

MATIES 24 (7) – Drieë: Wesley Wilkens (3). Doelskoppe: Donald Stevens (1), Sarel Potgieter (2). Strafdoel: Potgieter (1).

Intussen het nóg ’n Kaapse span wel daarin geslaag om sy noordelike opponent te troef.

Ikeys het die Universiteit van Johannesburg 34-31 geklop, nadat hulle halftyd 3-24 agter was.

Sapa berig die toeskouers is met aanskoulike hardlooprugby vermaak.

Puntemakers:

UJ 31 (24) – Drieë: André Smith, Jaco Snyman (2). Doelskoppe: Ryno Luus (2). Strafskoppe: Luus (3). Skepskop: André Smith.

IKEYS 34 (3) – Drieë: Marcello Sampson (2), Kyle Wickens, Matthew Rosslee. Doelskoppe: Rosslee (4). Strafskoppe: Rosslee (2).