AGT van Suid-Afrika se universiteite sal met mekaar meeding om die Varsitybeker, wat vanjaar die eerste keer aangebied word.

Studenterugby op sy beste is op die spyskaart vir die 31 wedstryde van die toernooi, waarvan sommige regstreeks op televisie uitgesaai sal word. Die wedstryde, wat op Maandae gespeel sal word, is op die suksesvolle aanbieding van Amerikaanse voetbalwedstryde op Maandagaande geskoei.

Die toernooi, wat deur FNB, Steinhoff, SA Brouerye en Canterbury geborg word, sal oor twee maande plaasvind waarin spanne oor ’n enkelronde meeding met twee halfeindstryde voor die eindstryd op 7 April.

Die sewe ander universiteite wat deelneem, is die Universiteit van Johannesburg (UJ), die Tshwane Universiteit van Tegnologie (TUT), die Universiteit van Kaapstad (Ikeys), Tukkies, die Noordwes-Puk Rugby-instituut (Pukke), die Nelson Mandela Metropolitaanse Universiteit (NMMU) en die Universiteit van die Vrystaat (Kovsies).

’n Hoogtepunt van die reeks is die drie wedstryde wat elke span sal speel in die rugbyfees wat in die Paasnaweek op George gehou word. Die halfeindstryd word op 31 Maart gespeel.

Volgens mnr. Belius Potgieter, rugbybestuurder van die Maties, lê daar ’n opwindende jaar van rugby vir die Matie-rugbyklub voor.

“Behalwe die nuwe Varsity-beker is daar die uitdaging om die twaalfde agtereenvolgende jaar die groot uitdaagbeker as die kampioenspan in die WP te verower.”

Wat betref die “veldslag” teen die Tukkies, verlede jaar se naaswenner van die klubkampioenskapsreeks (die Maties was die algehele wenner), op 18 Februarie het Potgieter gesê dit beloof om ’n opwindende aand te wees.

“Nie net word die eindstryd van die Nuwelinge-toernooi as die voorwedstryd gespeel nie, maar daar sal ook rasieleiers wees sowel as kompetisies vir die koshuise. Die gewone verversingsgeleenthede sal ook beskikbaar wees.

“Verskeie pryse vir studente sal ook in die aanloop tot die wedstryd deur die rugbyklub, die intervarsity­komitee en Eikestadnuus uitgeloof word. Die hoofwedstryd begin om 18:45.”

Behalwe die Tukkies moet die Maties ook teen die NMMU (23 Februarie in Port Elizabeth), die Pukke (3 Maart in Potchefstroom) en die Kovsies (8 Maart, tuis) speel. Die laaste drie wedstryde word die Paasnaweek op George gespeel tydens die Klein Karoo Nasionale Kunstefees. Die Maties se opponente sal dan die Ikeys, UJ en die TUT wees.  

Die Maties se wedstryde teen die Tukkies, Pukke, Ikeys en die TUT sal regstreeks op Supersport uitgesaai word. Na afloop van die ­George-toernooi sal die boonste vier spanne sake in die halfeindstryde en eindstryd uitspook.

Die WP-ligas begin vanjaar op 5 April.