Sy meld dat die skottelgoedwasser egter net tot op 8 Junie vanjaar gewerk het en dat sy 2 dae daarna die probleem by die handelaar aangemeld het.

Sy vertel die handelaar was soos altyd flink en het dadelik die werksbestelnommer aan haar gegee. Visser het intussen met Whirlpool in Kaapstad geskakel, wat aan haar gesê het dat die betrokke part uit Bloemfontein bestel is en dat dit vroeg die volgende week geïnstalleer sal word.

’n Week later het Visser nog niks van Whirlpool gehoor nie.

“Die verkoopsman by die firma waar ek die masjien gekoop het, het aan my verduidelik dat die masjien vervang sal word as hulle nie gou die part kry nie,” skryf sy.

Visser sê dat dit óók nie gebeur het nie en dat sy nou al meer as vier weke wag.

“Hoe kan firmas goed bemark waarvoor hulle nie onderdele in die hande kan kry nie?”

Sy het die saak op 6 Julie onder Kampvegter se aandag gebring.

Kampvegter het gaan aanklop by mnr. Victor Schenk, mediawoordvoerder van Whirlpool.

Schenk sê die betrokke part is deur die tegnikus ontvang en dat hy dit so gou moontlik sal installeer.

Schenk sê installasie in kleiner dorpies sloer soms aangesien vervoerkoste hoog is en tegnici probeer om verskeie mense tydens een besoek aan ’n dorp te help, en hul besoeke só beplan.

Visser het Kampvegter in kennis gestel dat die tegnikus haar op 8 Julie besoek het, maar nie die masjien kon herstel nie.

Whirlpool het egter belowe dat sy dieselfde dag nog ’n nuwe masjien sal ontvang.

Die saak is opgelos.