Die Burger | Kampvegter | Maak jou fonds jou siek?

Maak jou fonds jou siek?

CORLIA GOOSEN het besluit om ’n paar siekefondse te nader om uit te vind wat jou maandeliksse premie beïnvloed. Sy het ook ander nuttige inligting bekom wat ’n invloed op elke verbruiker het.

14/07/2008 12:25:35 PM - (SA)

WAT JY MOET WEET:

. Volgens wet moet alle siekefondse ’n minimum van 26 chroniese siektes in selfs die mees basiese plan dek.

. Die meeste siekefondse het inkomsteskemas; en indien jy in die lae-inkomste-groep val, sal jy minder vir jou maandelikse premies opdok as iemand in ’n ander inkomstegroep.

. Indien ’n verbruiker ’n eis wil indien, moet dit gewoonlik binne ’n sekere tyd vanaf die datum van behandeling die siekefonds bereik.

Discovery Health

Mediawoordvoerder: mnr. Alain Peddle, hoof van navorsing en ontwikkeling.

Wat het ’n invloed op die koste van ’n mediese plan?

.“Lede van ’n siekefonds moet volgens wet dieselfde bedrag vir dieselfde plan betaal,” meen Peddle.

. Die enigste differensiasie wat ’n invloed op die koste het, is die aantal afhanklikes op die spesifieke plan.

.Boetes kan wel opgelê word wanneer ’n individu laat in sy lewe by die fonds aansluit.

. Wagperiodes is ook soms van toepassing.

Hoeveel kos die volledekking-opsie per maand (Executive Plan)?

Hooflid: R2 306

Volwasse afhanklike: R2 603

Kind: R440

Gesin met drie kinders: R5 932

Hoeveel kos die basiese opsie per maand (KeyCare Core)?

. Hooflid verdien minder as R6 800 per maand.

Hooflid: R397

Volwasse afhanklike: R397

Kind: R100

Gesin met drie kinders: R1 094

. Hooflid verdien meer as R6 800 per maand.

Hooflid: R614

Volwasse afhanklike: R614

Kind: R138

Gesin met drie kinders: R1 642

Oxygen-siekefonds

Mediawoordvoerder: mnr. David Bombal, bemarkingsbestuurder.

Wat het ’n invloed op die koste van ’n mediese plan?

. “Tariewe verskil nie in die geval van geslag, ouderdom of gesondheidstatus nie,” sê Bombal.

. Hy meen dat een prys vir almal geld.

. Volgens Bombal kan ’n mens se maandelikse premie deur die siekefondsplan wat jy kies, die grootte van jou gesin, asook jou maandelikse inkomste, beïnvloed word.

. Inkomste speel slegs ’n rol as die siekefonds ’n inkomsteskema gebruik.

.Bombal meen dat dekking by ’n siekefonds uit twee keuses bestaan: ’n private tarief of siekefondstarief.

. Omdat dokters se tariewe varieer, is dit soms hoër as die siekefondstarief en daarom word baiekeer ’n inbetaling van die verbruiker verlang. In die geval waar ’n verbruiker die private-tarief-plan gekies het, is ’n bybetaling byna nooit nodig nie.

. Boetes en wagperiodes het egter ook ’n invloed.

Hoeveel kos die volledekking-plan per maand (Premium Plus)?

Hooflid: R1 580

Volwasse afhanklike: R1 580

Kind: R460

Betaal slegs vir een kind.

Gesin met drie kinders: R3 620

Hoeveel kos die basiese plan per maand (Care Cross)?

. Hooflid verdien minder as R6 500 per maand.

Hooflid: R580

Volwasse afhanklike: R525

Kind: R245

Gesin met drie kinders: R1 840

.Hooflid verdien meer as R6 500 per maand.

Hooflid: R855

Volwasse afhanklike: R740

Kind: R265

Gesin met drie kinders: R2 390

BESTmed

Mediawoordvoerder: me. Chanelle Willmot.

Wat het ’n invloed op die koste van ’n mediese plan?

Willmot meen dat BESTmed ’n verskeidenheid planne het wat by verskillende inkomstegroepe en behoeftes van verbruikers aanpas, en dat geslag of ouderdom glad nie ’n invloed op die koste van die planne het nie.

Hoeveel kos die volledekking-opsie per maand (Topcare)?

Hooflid: R2 058

Volwasse afhanklike: R1 646

Kind: R346

Gesin met 3 kinders: R4 742

Hoeveel kos die basiese opsie per maand (Millennium Basic)?

. Hooflid verdien minder as R6 500 per maand.

Hooflid: R570

Volwasse afhanklike: R450

Kind: R213

Gesin met 3 kinders: R1 659

. Hooflid verdien meer as R6 500 per maand.

Hooflid: R800

Volwasse afhanklike: R570

Kind: R267

Gesin met drie kinders: R 2171

Momentum Health

Mediawoordvoerder: me. Lee-Ann du Toit, hoofaktuaris: gesondheid.

Wat het ’n invloed op die koste van ’n mediese plan?

. “Die Wet op Siekefondse dui aan dat siekefondse koste slegs op gesinsgrootte en inkomste mag baseer,” sê Du Toit.

.Sy meen verder dat, aangesien almal dieselfde premie op dieselfde plan betaal, individue wat minder eis (meestal jonger mense) inderwaarheid individue wat meer eis (tipies ouer mense), subsidieer.

As gevolg hiervan is daar ’n laataansluitingsboete vir individue wat ná die ouderdom van 35 eers by die siekefonds aansluit.

Hierdie boete dien dus as aansporing om vroegtydig aan te sluit.

Hoeveel kos die volledekking-opsie per maand (Health Extender Plan)?

Hooflid: R1 829

Volwasse afhanklike: R1 375

Kind: R613

Gesin met drie kinders: R5 043

Hoeveel kos die basiese opsie per maand (Health Base plan)?

.Hooflid verdien minder as R6 850 per maand .

Hooflid: R547

Volwasse afhanklike: R496

Kind: R189

Gesin met drie kinders: R1 610

VINNIGE VERDUIDELIKINGS EN DEFINISIES:

Wagperiode:

.Dit is ’n tydperk waarin die lid geen eis mag instel nie.

.Siekefondse word toegelaat om wagperiodes te gebruik omdat dit die finansiële risiko van die skema beskerm.

.Dit verseker ook dat lede deurlopend aan konsekwente en regverdige voordele blootgestel word.

12-maande-wagperiode:

.Lede mag in dié tydperk nie ’n eis instel vir behandeling of ’n siekte wat met ’n spesifieke mediese toestand verband hou nie.

.Lede betaal steeds maandelikse premies gedurende dié tydperk.

3-maande-wagperiode:

.Lede mag drie maande lank nie ’n eis instel nie.

.Lede betaal steeds maandelikse premies gedurende dié tydperk.

Laataansluitingsboete:

.Dié boete moedig verbruikers aan om vroegtydig by ’n siekefonds aan te sluit.

.Boetes begin by die ouderdom van 35 met bykomstige bedrag van 5% en kan tot 75% beloop.

.Die boetes word volgens ’n vaste formule uitgewerk.

Inkomsteskema:

Skemas word toegelaat om te differensieer op die tarief wat gevra word, op grond van die persoon se inkomste.

Voorgeskrewe minimumvoordele (VMV):

Die minimumdekking wat elke lid moet hê soos voorgeskryf deur die Wet op Siekefondse.

ICD 10-kode:

.Dit is ’n diagnostiese koderingsisteem wat saam met die prosedurekoderingsisteem gebruik word.

.Diagnostiese kodes word gebruik om te bepaal wat verkeerd gegaan het, terwyl prosedurekodes gebruik word om die oplossing te bepaal.

.Albei kodes moet op state verskyn wanneer eise by siekefondse ingedien word.

Otoplastiek: kosmetiese chirurgie om die uiterlike voorkoms van ore te verander

Ginekomastie: die verwydering van manlike borste

Blefaroplastiek: kosmetiese chirurgie aan die boonste of onderste ooglid

Kolonoskopie: endoskopiese ondersoek van die kolon

Angiogram: X-strale van die bloedvloei binne ’n aar

VOOR 2000:

.het siekefondse maandelikse premies bepaal op grond van onder meer ’n mens se geslag, ouderdom, gesondheidstatus en of jy ’n roker of nieroker is;

.het ’n siekefonds jou ooreenkomstige risiko gevalueer en daarvolgens ’n premie bepaal; en

.kon ’n siekefonds selfs jou aansoek afkeur.

WAT JY MOET INVUL OM TE EIS?

.Lidmaatskapnommer

. hooflid se naam, voorletters en van

.pasiënt se naam, voorletters en van

.datum van behandeling

.koste van behandeling

.ICD 10-kode

.tariefkode

.diensverskaffer se naam

.diensverskaffer se praktyknommer

.hooflid se handtekening

.bewys van betaling, as die lid betaal het

Hier volg van die gevalle waar eise meestal nie deur siekefondse uitbetaal word nie, tensy dit deel van die VMV uitmaak:

.kosmetiese prosedures

.borsreduksie, otoplastiek, blefaroplastiek en ginekomastie

.obesiteit

.onvrugbaarheid

.alkohol- en dwelmmisbruik

.kolonoskopie en angiogram

.vrywillige deelname aan ’n oorlog, optogte en terrorisme

.opsetlike selfbesering

.opsetlike oortreding van die wet en gevangenisstraf

.wanneer ’n derde party volgens wet vir onkoste verantwoordelik is

.wanneer ’n individu eksperimentele en ongeregistreerde behandeling ontvang

.medisyne wat nie by die nasionale beheerraad geregistreer is nie

.reddingsoektogte

Teken in op Die Burger


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|