OP die vraag “Wat het omgee, Glen-tee en leukemie met mekaar te doen?” sal die meeste mense dalk net hul kop skud. Huis Visser antwoord egter anders. Die manne van Snoektown is oortuig dat ’n bietjie omgee soos Glen-tee is: “It really goes a long way.”

Omgee. Dít is een van die vier waardes wat Huis Visser elke jaar aan sy nuwelinge probeer oordra. Die Huis Visser-HK en -eerstejaars het vanjaar geld ingesamel om Sunflower-kopdoeke te koop. Sommige van die Huis Visser-eerstejaars het ook gekies om hul hare te skeer as ’n teken van empatie met kinders en gesinne wat deur kanker en spesifiek leukemie geraak word.

Die koshuis beplan om ook later in die jaar ’n geleentheid saam met die Sunflower-fonds te organiseer waar mense donasies kan doen en hulself as moontlike beenmurgskenkers beskikbaar kan stel.

Die leuse van die Sunflower-fonds is aangrypend. Dit lui: “Share a little; save a life.”

Dit is beslis iets om oor na te dink wanneer jy weer ’n gesonde koppie tee geniet.

Vir meer inligting, besoek gerus die Sunflower-fonds se webblad www.sunflowerfund.org.za. – Chris-Fick van Niekerk