DIE 18-jarige Matie-atleet Wilhelm van der Vyfer is tans Suid-Afrika se vinnigste man oor 100 m.

Van der Vyfer het Vrydag in die uitdunne van die Suid-Afrikaanse junior-en-jeugbyeenkoms (o.17 en o.19) in Pretoria die 100 m in ’n tyd van 10.30 sek. afgeblits. Dít is die vinnigste tyd vanjaar deur ’n Suid-Afrikaanse mansatleet en is ’n nasionale junior rekord (o.19).

Tot voor Vrydag was die 10.32 sek. van Hannes Dreyer, die Suid-Afrikaanse senior kampioen in die 100 m, die beste tyd vanjaar oor 100 m.

Eintlik is Van der Vyfer se vertoning meer as ongelooflik. Hy het sy eerste uitdun in 10.32 sek. afgeblits en daarmee Leigh Julies se rekord geëwenaar. Sy tyd in die halfeindronde was 10.30 en in die eindronde 10.36.

Dit was so byna of Van der Vyfer se atletiekloopbaan het vroeg tot ’n einde gekom. Hy was twee jaar gelede die Suid-Afrikaanse o.17-kampioen, maar toe word hy deur die een dyspierbesering ná die ander geteister. Sy broer, Marthinus, was ’n belowende hekkiesatleet voordat ’n dyspierbesering sy loopbaan beëindig het.