DIE Suid-Afrikaanse netbal­kaptein, Bronwyn Bock-Jonathan, het gewys sy is nie net ’n raakvatter met ’n netbal nie, maar steek ook op akademiese gebied nie lyf weg nie.

Bock-Jonathan, ’n dosent in sportwetenskap aan die Universiteit Stellenbosch en die inwonende hoof van die vrouekoshuis Nemesia, het onlangs haar doktorsgraad in sportwetenskap behaal.

Sy het reeds ’n hele rits grade verwerf, maar het gesê die opgewondenheid word nie minder nie.

“Ek dink dit is my vyfde graad,” het sy gesê terwyl sy die grade op haar vingers afgetel het.

Met dié een ook nou behaal, het sy uiteindelik weer meer tyd om haar in haar loopbaan te vestig.

“Ek het min geslaap in 2007, maar nou het ek weer tyd vir my familie en nuwe dinge wat ek wil aanpak.”

Bock-Jonathan se studie vir haar doktorale tesis het gefokus op die gevolge van tienermeisies se deelname aan bewegingsprogramme ten opsigte van hul selfbeeld, bewegingsbevoegdheid en elastisiteit.

Volgens haar is die waardevolste ding wat sy daaruit geleer het dat sukses nie noodwendig ’n goeie selfbeeld waarborg nie.

Sy het gesê haar navorsing kan tieners en onderwysers help.

“Hopelik gebruik hulle dit en vergader dit nie stof in die biblioteek nie,” het sy daaroor geskerts.