STELLENBOSCH. – Vrydagaand was ons in Bohemia, ’n kuierplek in die middedorp. Ons eerste biere was nog in die nekkie van die bottel toe die polisie instorm, met wapens in die hand.

Ons is op die vloer neergegooi, soos die ander besoekers aan die kuierplek. Verskeie mense reg voor my het pepersproei in die gesig gekry, en die gas het lank daarna nog in die lug rondgedraal.

Twee vroue langs my het erg begin hoes van die gas, hoewel ons – gelukkig – darem so twee meter weg was van waar dit geskiet is. Ons het op ons hurke gaan sit en ’n ander polisiebeampte het gebulder: “Get the f–k down,” al was die vloer vol drank en gebreekte glas.

Op die grondverdieping het ’n chaos uitgebreek toe ’n polisiebeampte ’n meisie teen die reëling vasgestamp en sowat ’n halfdosyn glase op die vloer versplinter het. ’n Man so twee meter van ons af het boontoe geskree: “Jy kan nie so maak nie! Sy’s ’n vrou!” Die polisieman het by die trappe afgekom en pepersproei in die ou se gesig kom sproei.

Toe dit hom tref, het die oë van die man agter hom begin traan en hy het ge­vomeer. Hy het opgestaan om weg te beweeg toe nog ’n polisieman hom met ’n kroegstoel slaan en sê hy moet plat lê.

Deurgaans is mense deursoek en na buite gestuur. Ons is deursoek en het die pad oorgesteek, ’n kamera en notaboek uitgehaal en foto’s van die toneel begin neem. Verskeie mense het huilend uitgekom, en beweer die polisie het hulle mishandel. ’n Vrou, Adel, het betraand op die sypaadjie gesit nadat ’n polisielid haar na bewering met die vuis deur die gesig geslaan het, en haar geklap het.

’n Polisieman wou nie toelaat dat foto’s geneem word nie. “Wie de f–k het jou toestemming gegee om hier foto’s te neem? Ek het jou nie f–kken toestemming gegee nie!” het hy geskree.

Ons het hom ingelig dat aangesien dit ’n openbare plek is, kan ek kragtens wet foto’s van die toneel neem solank dit nie met die polisie se taak inmeng nie.

Dit het nie gehelp nie.

By Mystic Boer, langs Bohemia, het dinge byna tot geweld gelei toe die polisie ’n student se selfoon afgevat en hom aan die hemp rondgepluk en gedreig het toe hy hulle skel. Nadat die polisie Francois Nel se kamera gekonfiskeer het, het hulle hom weggestamp met die afskeidsgroet: “F–f, jou p–s, gaan slaap!”

. Jason Boswell en Stephan Matthee is nagraadse joernalistiekstudente aan die Universiteit Stellenbosch.