WAT ’n keuse! Lesers het van vandag af die kans om per SMS te stem vir die topdrie van die pragtige finalis-foto’s in Die ­Burger en Buite se natuurfotokompetisie.

Lesers moet hul SMS-boodskap begin met “my fo­to”, ­gevolg deur die nom­mer van die foto van hul keuse. SMS’e kan gestuur word na 34588 en kos R2,00 per sms.

Lesers word tot vyf SMS’e per selfoon beperk.

Die stemmery begin vandag en eindig volgende Woensdag om 17:00.

Vyf lesers wat stem, gaan bewyse van R200 elk vir die druk van foto’s by Fotofirst losslaan.

Die wenners van die eerste, tweede en derde prys sal volgende Vrydag in die koerant gepubliseer word.

Hulle kan uitsien na heerlike wegbreke na Noordwes, die Oos-Kaap en die Laeveld.

Pryse van ’n allemintige R114 000 is op die spel, danksy die welwillendheid van vyf medeborge.

Een van hierdie borge is die private wildtuin Samara in die Kamdeboo. Die tweede prys behels verblyf en etes vir twee mense vir vier nagte daar.

Die waarde van die eerste prys in die fotokompetisie beloop R74 000 en sluit in twee nagte se verblyf en etes vir vier mense in die vyfster- Royal Madikwe Lodge in Noordwes se Madikwe-wildtuin, ’n retoerhuurvlug geborg deur eMoyeni Air ter waarde van R18 000 van Johannesburg na die wildtuin, asook ’n spoggerige Fuji Finepix S100FS-kamera ter waarde van R8 000.

Laeveld Toerisme borg die derde prys – ’n week se verblyf en etes vir een persoon in die Umhloti Lodge by Jane Goodall se sjimpansee-rehabilitasie­sentrum op Nelspruit.