OUDTSHOORN. - Sarah Theron is op die Absa KKNK beseer toe ’n trap onder haar meegegee het.

“Ek het ’n wond van sowat 5 cm op my regterskeen,” het Theron gister gesê.

Volgens haar is die trap kort voor Woensdagaand se vertoning van Nuwe Generasie Divas in die Suid-Kaap Kollege-saal voor die verhoog neergesit.

“Gelukkig het niemand die trap gedurende die vertoning gebruik nie.

“Toe ek ná die vertoning by die trap afstap, het die tweede treetjie van bo af meegegee.

“Dit moes voor die tyd al stukkend gewees het.”

Volgens haar het iemand dadelik “iets koud” en ’n ontsmettingsmiddel op die wond gesit waaruit die bloed stadig gesypel het.

Theron het haar vriend, Peter Mitchell, gebel, wat haar na die Oudtshoorn Medi-Clinic geneem het.

“Ek het ’n klem-in-die-kaak­inspuiting en antibiotika gekry voordat die wond verbind is.”

“Gewoonlik dra ek ’n langbroek en niemand sal eers agterkom my been is seer nie.”

Dit sal beslis ook nie haar vol program oor die volgende paar dae aan bande lê nie.

Sy moet nog twee vertonings van Divas doen.

Daarbenewens moet sy ook aan ’n kookkompetisie by die Vonk-kuiertuin deelneem, by die Feeskasteel optree en Egoli se Leef soos ’n Ster-prystrekking doen.

Me. Paula Schoeman, woordvoerder van die Absa KKNK, het die voorval betreur en gesê die trap is intussen herstel.