OUDTSHOORN. - ’n Vertoning van Paulus, wat vandag om 15:00 in die SANW-ouditorium op die Absa KKNK sou plaasvind, moes gekanselleer word omdat ’n Lang dagreis na die nag so lank is.

Die eerste vertoning van laasgenoemde was Woensdagaand.

’n Lang dagreis na die nag duur 3 uur en 20 minute, het me. Paula Schoeman, KKNK-woordvoerder, gister gesê.

Feesgangers wat reeds kaartjies vir die betrokke vertoning van Paulus gekoop het, word versoek om dit by Computicket om te ruil vir die vertoning wat oorbly, naamlik op Saterdag 29 Maart om 19:00. Andersins sal hulle vir die kaartjie vergoed word.

Compu­ticket is onder die pawiljoen by die Huisgenoot­musiekplaas geleë.

Schoeman het daarop gewys dat die kansellasie plaasgevind het ná oorlegpleging met die regisseur van Paulus, Henry Mylne.

“Die Absa KKNK waardeer die feit dat mnr. Mylne ingestem het om die tegniese ondersteuning­span tegemoet te kom.”