OUDTSHOORN. - Slegs twee musiekvertonings, dié van Chris Chameleon seKlassieke Chameleonen Amanda Strydom se Amanda Strydom, is gunstelinge onder feesgangers op die Absa KKNK.

Drie musiekteatervertonings is ook op die lys van die 20 topvertonings in terme van kaartjieverkope.

Ivor Price, ’n Kanna-paneellid, het gesê dit is nie vir hom ’n verrassing dat daar so min kontemporêre musiek onder die topverkopers tel nie.

“Goeie teater is skaarser om te sien, hoewel dit ’n jammerte is, want daar’s heelwat musiek-juweeltjies op die fees.

“Verder is daar ook ’n ooraanbod doef-doef-doef by gratis musiekverhoë en ander venues vir ligte, Afrikaanse musiek.”

Margit Meyer-Rödenbeck, bekend vir haar rol as die lawwe Dowwe Dolla, meen feesgangers kom na die kunstefees met die idee om toneelstukke, eerder as musiekvertonings, te kom kyk.

“Ek dink by feeste begroot mense om shows te kyk wat hulle nie normaalweg kyk nie.”

Die befaamde musikant Valiant Swart, ook ’n ou-feeshand, het gesê die rolle het nou omgeswaai.

“In die begin was dit andersom, daar was baie gratis musiekvertonings om na te luister,” het Swart gesê.

“Die KKNK het Afrikaanse teaterkultuur hervestig.

“En daar’s so ’n groot aanbod van musiek by die fees.”

Intussen is sowat 4 700 kaartjies vir vertonings Woensdag verkoop, berig Tisha Steyn.

“Die kaartjieverkope neem weer toe nadat die verkope ná die langnaweek bietjie afgeneem het,” het me. Paula Schoeman, feeswoordvoerder, gesê.

Die volledige lys is soos volg:

1. Cirque du Sussie

2. Sophia Mentz beredder haar boedel

3. Dowwe Dolla

4. Klassieke Chameleon

5. Binnelanders Buiteweste

6. ’n Lang Dagreis na die Nag

7. Shirley Valentine

8. Om Soos ’n Lyk te Lê

9. Breinbliksem

10.Amanda Strydom

11.Wyk 14

12.Hallelujah

13.Dagboek van ’n Swerwer (musiekteater)

14.Die Duiwel Dra Crocs (musiekteater)

15.Maaltyd vir Een

16.Not the Big Easy

17.Dirk en Lindie (’n Operette)

18.Trolliekind

19.Die Keiser

20.Saad